Մարտունի քաղաքի բնակիչներն արդեն մոտ 20 օր է` ապրում են ապաստանում, բայց չեն լքում հարազատ քաղաքը։ Նրանք Sputnik Արմենիայի թղթակիցներին պատմել են, որ քաղաքում «Գրադ» համազարկային կրակի ռեակտիվ կայանքի արկերն ընկնում են երեկոյան ժամերին` 21։00–ից սկսած մինչև առավոտյան 7-ը:
Կանանց ու երեխաներին հասցրել են քաղաքից դուրս բերել։ Այժմ իրենք են եփում–թափում, մինչև ամեն ինչ ավարտվի, ու դուրս գան ապաստարանից։
Ի դեպ, ապաստարանում մեր թղթակիցները կրկին հանդիպել են Մարտունի քաղաքի այն բնակչին, որի տունն ավերվել էր հրետակոծության հետևանքով։ Նա չորս որդի ունի, որոնք այժմ ռազմաճակատում են, արդեն երեք օր լուր չունի նրանցից, բայց չի հուսահատվում, հավատում է, որ ամեն ինչ լավ է։ Նա ևս չի պատրաստվում լքել Մարտունի քաղաքը։