ԵՐԵՎԱՆ, 13 հոկտեմբերի - Sputnik. ՀՀ առողջապահության նախարար Արսեն Թորոսյանն այցելել է Գեղարքունիքի մարզում գտնվող Վարդենիսի և Մարտունու բժշկական կենտրոններ։ Տեղեկությունը հայտնում է առողջապահության նախարարության մամուլի ծառայությունը։
Նախարարը Գեղարքունիքի մարզպետ Գնել Սանոսյանի ուղեկցությամբ եղել է բժշկական կենտրոններում, տեղում ծանոթացել վիրավորների բուժման կազմակերպման գործընթացին:
«Շրջայցի ընթացքում նախարարը հետաքրքրվել է բժշկական կենտրոնների անհրաժեշտ կարիքներով և հավաստիացել, որ թե՛ բուժանձնակազմը, և թե՛ բուժօգնության կազմակերպման հարցերը մատուցվում են բարձր որակով»,- նշված է հաղորդագրության մեջ։
Զինվորների հետ զրույցի ընթացքում նախարարը շնորհակալություն է հայտնել անձնազոհ ծառայության համար և շուտափույթ ապաքինում մաղթել:
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 13-ի ժամը 10:30-ի դրությամբ` հակառակորդի կրակոցների հետևանքով զոհվել են 532 զինծառայողներ և 31 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 5139 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 18 ինքնաթիռ, 16 ուղղաթիռ, 173 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 521 տանկ և ՀՄՄ:
Ինչին պետք է ընտելանանք, եթե Ադրբեջանի հետ պատերազմը երկարի
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Հրադադար, բայց ոչ խաղաղություն. ի՞նչ խնդիր պետք է լուծի բանակը արցախյան պատերազմից հետո