ԵՐԵՎԱՆ, 12 հոկտեմբերի – Sputnik. Ադրբեջանի գլխավոր դատախազությունը քրեական գործ է հարուցել ռուս լրագրող Սեմյոն Պեգովի՝ @Wargonzo նախագծի հեղինակի նկատմամբ:
Քրեական գործը հարուցվել է 214-2 (ահաբեկչության հրապարակային կոչեր), 281.1 (պետության դեմ ուղղված հրապարակային կոչեր) և 318.2 (Ադրբեջանի Հանրապետության պետական սահմանի ապօրինի հատում) հոդվածներով:
Այսօր ՏԱՍՍ–ը հայտնել էր, որ Ռուսաստանի իրավապահ մարմինները սկսել են ստուգել քաղաքագետ Սադաթ Գուլիևի` «Девичья башня» Telegram–ալիքում արված հրապարակումները, որոնք վերաբերում են Ղարաբաղին։
Ավելի վաղ Գուլիևը, ի պատասխան ռազմական թղթակից Սեմյոն Պեգովի՝ Ղարաբաղում ընթացող պատերազմի, այդ թվում ՝ Ադրբեջանի ԶՈւ գործողությունների մասին հրապարակումների, լրագրողին մահ էր «մաղթել» և գրել, որ նա «կոչնչացվի»: Բացի դրանից, քաղաքագետը մի քանի հրապարակումներում անպարկեշտ խոսքեր էր ասել Պեգովի հասցեին։
Ստուգման արդյունքում կորոշվի քրեական գործ հարուցելու կամ մերժելու հարցը։
Նշենք, որ ռուսաստանցի թղթակիցներն արցախյան իրադարձությունները լուսաբանում են իրենց կյանքը վտանգելով։ Այսպես, հոկտեմբերի 8-ին Շուշիի Ղազանչեցոց եկեղեցին հրթիռակոծելու հետևանքով տուժել են ռուս լրագրողներն ու նրանց ուղեկցող անձինք։ Մասնավորապես, ծանր վնասվածքներ է ստացել ռազմական մեկնաբան Յուրի Կոտենոկը։ Լրագրողն այժմ գտնվում է Երևանի «Էրեբունի» բժշկական կենտրոնում։ Նրանից բացի, վիրավորվել են նաև «Ռուսաստանի սպաներ» պորտալի հատուկ թղթակից Լևոն Արզանովն ու Հրանտ Բալադյանը։ Նրանց վիճակը կայուն է, հոկտեմբերի 9-ին նրանք կառավարական ինքնաթիռով տեղափոխվել են Ռուսաստան։
«Քահանան աղոթում էր, որ չմահանամ»․ Արցախում վնասվածք ստացած լրագրողը հարցազրույց է տվել