ՀՀ առողջապահության նախարարությունը Facebook–ի պաշտոնական էջում տեսանյութ է հրապարակել, որը պատմում է Երևանի «Սուրբ Աստվածամայր» ԲԿ տեղափոխված վիրավոր երեխաների մասին։
15-ամյա Նարեկը պատմում է` առավոտյան արթնացան պայթյունի ձայներից, հասկացան, որ թշնամին բնակավայրին է հարվածներ հասցնում, նստեցին մեքենա` փորձելով հեռանալ վայրից։
«Գնալու ճանապարհին բեսպիլոտնիկի ձեն էինք լսում, մի քիչ գնում ենք, խփում են ավտոյին։ 20 մետր գլորվում ենք ձորը»,– պատմում է Նարեկը։ Նրան հաջողվում է մեքենայից դուրս բերել նաև վիրավոր կրտսեր եղբորը, վնասվածքներով բարձրանալ ձորից ու առաջին պատահած մեքենայով հասնել մոտակա հիվանդանոց:
13-ամյա Ռոբերտն Արցախից տեղափոխվել է արհեստական շնչառությանը միացված, ծայրահեղ ծանր վիճակում`ծանր զուգակցված տրավմայով։ ԲԿ տնօրեն Նիկոլայ Դալլաքյանի խոսքով` այսօր արդեն որոշակի դինամիկա, գիտակցության նշույլներ կան, որոշ հրահանգներ է կատարում։ Հուսով են, որ տղային ոտքի կկանգնեցնեն։
Թեպետ Նարեկն ինքն էլ դեռ ապաքինված չէ, բազմաթիվ վնասվածքներ ունի, բայց արդեն տուն վերադառնալու մասին է մտածում։
«Ես էլ կգնայի կռիվ ու առանց մտածելու»,– ասում է նա։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 8-ի ժամը 11։00-ի դրությամբ` հակառակորդի կրակոցների հետևանքով զոհվել են 324 զինծառայողներ և 19 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 4069 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 16 ուղղաթիռ, 145 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 496 տանկ և ՀՄՄ:
Փայլուն օպերացիա Արցախում. ազատագրվել է դիրքերից մեկը, փրկվել 19 զինվորի կյանք
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հեծանիվի անվադողը՝ «ժգուտ», պատկերասրահն էլ՝ տեսակավորման կայան. կամավոր դարձած հայություն