ԵՐԵՎԱՆ, 7 հոկտեմբերի - Sputnik. Գերմանիայի արտաքին գործերի նախարար Հայկո Մաասը չի բացառում, որ Եվրամիությունը կարող է Ադրբեջանի վրա ճնշում գործադրել Լեռնային Ղարաբաղում հրադադարի հասնելու նպատակով: Նա այդ մասին խոսել է Բունդեսթագում ելույթի ժամանակ։
Մաասի խոսքով` Հայաստանը հստակ ցույց է տվել, որ սկզբունքորեն կողմ է հրադադարի։ Ավելի վաղ ՀՀ վարչապետ Նիկոլ Փաշինյանը «Ֆրանսպրեսին» տված հարցազրույցում ասել էր, որ հակամարտությունները պետք է լուծվեն փոխզիջումների հիման վրա: Նրա խոսքով` Ղարաբաղը և Հայաստանը պատրաստ են զիջումների այնքանով, որքանով Ադրբեջանն է պատրաստ
«Այս պահին մենք սպասում ենք, որ ադրբեջանական կողմը, ինչպես Հայաստանը, հրադադարին համաձայնելու սկզբունքային պատրաստակամություն կհայտնի։ Եթե այդ կողմը պատրաստ չէ դրան, ես կարծում եմ, որ ԵՄ-ն պետք է ճնշում գործադրի նրա վրա», - հայտարարել է Մաասը։
Նա հավելել է, որ այսօր երեկոյան խոսելու է ադրբեջանցի գործընկերոջ հետ, և այդ հարցն օրակարգում է:
«Եթե մենք հայտնվենք մի իրավիճակում, երբ մի կողմը պատրաստ է հրադադարի, իսկ մյուսը` ոչ, ԵՄ - ում, իհարկե, պետք է քննարկենք ադրբեջանական կողմի վրա ճնշման հետագա ավելացումը», - նշել է նա:
Բացի այդ, Մաասը հայտարարել է, որ քննարկումներ են ընթանում այլ երկրների հետ, ինչպիսիք են Ռուսաստանն ու Թուրքիան, որոնք ավելի մեծ ազդեցություն ունեն հակամարտության կողմերի վրա:
Ինչ վերաբերում է հակամարտության լուծման ձևաչափին, նախարարը նշել է, որ Թուրքիան ինքն է համարում, որ Մինսկի խումբը չի համապատասխանում այդ ձևաչափին։
«Այս պահին Մինսկի խումբն այն ձևաչափը չէ, որը լրջորեն քննարկվում է», — ասել է արտգործնախարարը:
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 7-ի ժամը 16։00-ի դրությամբ` հակառակորդի կրակոցների հետևանքով զոհվել են 324 զինծառայողներ և 19 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3754 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 18 ուղղաթիռ, 128 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 416 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ