ԵՐԵՎԱՆ, 7 հոկտեմբերի – Sputnik. Ռուսաստանի և Ադրբեջանի նախագահներ Վլադիմիր Պուտինն ու Իլհամ Ալիևը քննարկել են Լեռնային Ղարաբաղու տիրող իրադրությունը։ Տեղեկությունը հայտնում է Ադրբեջանի նախագահի մամուլի ծառայությունը:
Ղարաբաղյան հակամարտության գոտում ռազմական ակտիվ գործությունների մեկնարկից ի վեր սա Պուտինի և Ալիևի առաջին խոսակցությունն է։ Մինչ այդ ռուսական կողմը շփում էր ունեցել ԱԳՆ-ի մակարդակով։ Ինչպես ավելի վաղ հայտնել էր ՌԴ նախագահի մամուլի քարտուղար Դմիտրի Պեսկովը, արտգործնախարար Լավրովը մշտական կապի մեջ է թե՛ Ադրբեջանի, թե՛ Թուրքիայի գործընկերների հետ:
Ալիևը զանգել է Պուտինին ծննդյան օրվա առթիվ շնորհավորելու համար։ Այդ ֆոնին երկու երկրների ղեկավարները քննարկել են Ղարաբաղյան հակամարտության հետ կապված իրավիճակը։
«Ռոսիա 24» հեռուստաալիքին տված հարցազրույցում ՌԴ նախագահ Վլադիմիր Պուտինը հայտնել է, որ մշտական կապի մեջ է ՀՀ վարչապետ Նիկոլ Փաշինյանի հետ։ Ղարաբաղա–ադրբեջանական սահմանագոտում իրադրության սրացումից ի վեր նրանք արդեն 4 անգամ խոսել են հեռախոսով։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 6-ի ժամը 09։00-ի դրությամբ` հակառակորդի կրակոցների հետևանքով զոհվել են 284 զինծառայողներ և 19 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3754 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 18 ուղղաթիռ, 128 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 416 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ