Ադրբեջանի հրետակոծությունից վիրավորված ֆրանսիացի լրագրողներն «Էրեբունի» ԲԿ–ից ուղղաթիռով տեղափոխվեցին «Զվարթնոց» օդանավակայան։ Այնտեղից «Le Monde» պարբերականի երկու լրագրողները կմեկնեն Ֆրանսիա։
Լրագրողների հետ զրույցում ֆրանսահայ բժիշկ Գևորգ Աբգարյանն ասաց, որ «Le Monde» պարբերականի լրագրող Ալան Կավալին վիրահատել են։ Վիրահատությունը հաջող է անցել։ Տղան արկի պայթյունի հետևանքով բեկորային վնասվածք էր ստացել, և բեկորներից մեկը որովայնում էր հայտնվել։ Աբգարյանը վստահեցրեց` Ալանի կյանքին վտանգ չի սպառնում, քանի որ բեկորը կենսական կարևոր օրգանները չի վնասել։
«Le Monde» պարբերականի լրագրող Ռաֆայել Շարլզ Յաղոբզադեն, որի վիճակն ավելի թեթև էր, լրագրողների հետ զրույցում պատմեց` դեպքը տեղի է ունեցել Մարտունիում, երբ գործընկերոջ հետ փորձել են նկարահանման գնալ։
«Առաջին օրն էր, որ եկել էինք Արցախ։ Ուզում էինք գնալ, զրուցել վիրավորների հետ։ Միշտ ուշադիր ենք արտակարգ իրավիճակ լուսաբանելիս և անպայման պատսպարվում ենք։ Սակայն այս դեպքում պայթյունը միանգամից եղավ, ու չհասկացանք` ոնց եղավ»,–ասաց Ռաֆայելը։
Լրագրողը պատմում է` ինչպես են իրենք ռմբակոծության տակ ընկել. տեսանյութ
Նշենք, որ նրանց հիվանդանոցից օդանավակայան էր ուղեկցում ՀՀ-ում Ֆրանսիայի դեսպան Ժոնաթան Լաքոտը, ՀՀ Մարդու իրավունքների պաշտպան Արման Թաթոյանը։
Հիշեցնենք` երեկ Արցախի Մարտունի քաղաքում հակառակորդի թիրախում էին հայտնվել լրագրողական խմբերը։ «Le Monde»–ի 2 թղթակիցները, «24News»–ի լրագրողն ու «Արմենիա» TV–ի օպերատորը վիրավորվել էին։
Մարտունիում ֆրանսիացի լրագրողներին ուղեկցող երիտասարդը զոհվել է