ԵՐԵՎԱՆ, 28 սեպտեմբերի – Sputnik. Երևանի «Էրեբունի» ԲԿ–ն տեսանյութ է հրապարակել այն մասին, թե ինչպես են դիմավորում Արցախից ուղղաթիռներով Երևան տեղափոխվող վիրավորներին։
Գործընթացին մասնակցում է նաև ՀՀ առողջապահության նախարար Արսեն Թորոսյանը։
«Էրեբունի» ԲԿ–ի լրատվական ծառայությանը տված հարցազրույցում նախարարը հայտնում է, որ Արցախից Հայաստան են տեղափոխվում այն զինծառայողներն ու քաղաքացիները, որոնք ունեն տևական բուժօգնության կարիք։
Ընդ որում` վիրավորները նախ Արցախից տեղափոխվել են Գորիսի ու Վարդենիսի ԲԿ–ներ, այնտեղից` Երևան։
«Գորիսի և Վարդենիսի հիվանդանոցներում ծավալվել են միջանկյալ տարհանման կետեր, որտեղ անհրաժեշտության դեպքում գնահատվում է պացիենտների վիճակը, կատարվում են ավելի խորը քննություններ, որոշվում է, թե որ հիվանդանոց տեղափոխել»,– ասում է Թորոսյանը։
Որոշ անհետաձգելի դեպքերում, նախարարի խոսքով, Ստեփանակերտից Երևան տեղափոխումն իրականացվում է անմիջապես։
Թորոսյանը հայտնեց, որ Երևանում Արցախից տեղափոխվող վիրավորներին ընդունում են նաև «Աստղիկ», «Միքայելյան», «Արմենիա» ԲԿ–ները։
«Բոլոր այն բժշկական կենտրոնները, որոնք կարող են սպասարկել տրավմատիզմով կամ բեկորային, հրազենային վնասվածքներով վիրավորներին, բերվել են պատրաստության բարձր աստիճանի»,– ասաց Թորոսյանը։
Նախարարը հայտնեց, որ բարեբախտաբար, այս պահին նման ծանր վիճակում գտնվող` տեղափոխման ենթակա վիրավորների թիվը փոքր է։ Նրանք կա՛մ արդեն տեղափոխվել են, կա՛մ այս պահին ճանապարհին են։ Նախարար Թորոսյանը վստահեցրեց, որ որևէ վիրավոր առանց բուժօգնության չի մնում։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Ըստ վերջին տեղեկությունների` ադրբեջանական զինուժը կորցրել է 5 ուղղաթիռ, 36 անօդաչու թռչող սարք, 47 տանկ և ՀՄՄ, 2 ինժեներական զրահատեխնիկա։ Մարտերը շարունակվում են։
Արսեն Թորոսյանն այցելել է վիրավոր զինծառայողներին. լուսանկարներ
Հակառակորդի կրակոցների հետևանքով զոհվել են 58 զինծառայողներ և 2 քաղաքացիական անձինք։ Հայկական կողմը շուրջ 200– վիրավոր ունի։ Հակառակորդի կորուստներն անհամեմատ մեծ են։ Արցախում և Հայաստանում ռազմական դրություն և համատարած զորահավաք է հայտարարվել։
Հայ բարձրաստիճան զինվորականի մահվան մասին լուրերը սուտ են. Հովհաննիսյան