ԵՐԵՎԱՆ, 19 Սեպտեմբեր — Sputnik. ՀՀ առողջապահության նախարարությունը տեղեկացնում է, որ սեպտեմբերի 1-ին Արմավիրում գտնվող «Պռոշյանի կոնյակի գործարանի» մասնաճյուղում տեղի ունեցած հրդեհի հետևանքով տուժածներից մեկը մահացել է։
Sputnik Արմենիայի տեղեկություններով ՝ մահացողը Պռոշյանի գործարանի 24-ամյա աշխատակից, գինեգործ Հովիկն է։ Նախօրեին նրան ծանր վիրահատություն են արել, որից հետո երիտասարդն այդպես էլ գիտակցության չի եկել։
«Հրդեհի հետևանքով տուժած 4 պացիենտ բուժում էր ստանում Այրվածքաբանության ազգային կենտրոնում:Նրանցից մեկը, ցավոք, երեկ մահացել է: Մեկ պացիենտ դուրս է գրվել»,–նշված է ԱՆ հաղորդագրության մեջ։
Ինչ վերաբերվում է մյուս 2 տուժածների առողջական վիճակին, ապա նրանք միջին ծանրության են, վերակենդանացման բաժանմունքից տեղափոխվել են այրվածքային բաժանմունք:
Հիշեցնենք` սեպտեմբերի 1-ին, ժամը 12:08-ին Մարզային ճգնաժամային կառավարման կենտրոն ահազանգ է ստացվել, որ հրդեհ է բռնկվել Արմավիր գյուղի «Պռոշյան կոնյակի գործարանում»։ Դեպքի վայր են մեկնել ԱԻՆ ՓԾ Արմավիրի մարզային փրկարարական վարչության օպերատիվ խումբը և հրշեջ-փրկարարական ջոկատներից չորս մարտական հաշվարկ: Հրդեհը մեկուսացվել է ժամը 12։44-ին, մարվել՝ 13:12-ին: Պայթյունի օրը 2 մարդ էր մահացել` գործարանի մասնաճյուղի տնօրենը և զոդման աշխատանքներ իրականացնող Ա/Ձ–ի տնօրեն Արեն Առաքելյանը։
«Պռոշյանի կոնյակի գործարանի» Արմավիրի մասնաճյուղում աշխատանքները վերսկսվել են