ԵՐԵՎԱՆ, 4 սեպտեմբերի - Sputnik. Արմավիրի մարզի 42-ամյա բնակչին մեղադրանք է առաջադրվել երկու մարդու մահվան պատճառ դարձած ավտոպատահարի առթիվ հարուցված քրեական գործի շրջանակներում։ ՀՀ քննչական կոմիտեն տեղեկացնում է, որ քննությամբ ձեռք բերված տվյալների համաձայն՝ մայիսի 10-ին, ժամը 01:00-ի սահմաններում, 42-ամյա տղամարդն իր կողմից շահագործվող ԲՄՎ 525Ի մակնիշի մեքենան վարել է ալկոհոլային ազդեցությամբ, թույլատրելիից բարձր արագությամբ և դուրս է եկել ճանապարհի հանդիպակաց երթևեկելի գոտի։
«Երասխահուն-Վարդանաշեն ճանապարհի 3-րդ կմ-ի հատվածում թույլ է տվել ճանապարհային երթևեկության կանոնների պահանջներին հակասող գործողություն՝ վարել է տեսանելիությանը համապատասխանող թույլատրելի արագությունը գերազանցող արագությամբ, դուրս է եկել հանդիպակաց ուղղության երթևեկելի ուղեմաս և բախվել Արմավիրի մարզի Երասխահուն գյուղի 27-ամյա բնակչի կողմից վարած «Վազ 21074» մակնիշի ավտոմեքենային: Իր գործողություններով պայմանավորելով տվյալ վթարի առաջացումը և ինքն իրեն զրկելով վթարը կանխելու տեխնիկական հնարավորությունից՝ 27-ամյա վարորդին և 65-ամյա ուղևորին՝ վերջինիս մորը, անզգուշությամբ պատճառել է մահ»,- նշված է կոմիտեի տարածած հաղորդագրության մեջ:
Ձեռք բերված բավարար ապացույցների համակցությամբ՝ 42-ամյա տղամարդուն մեղադրանք է առաջադրվել՝ ՀՀ քրեական օրենսգրքի 242-րդ հոդվածի 3-րդ մասով (Ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ):
Նրա նկատմամբ որպես խափանման միջոց է ընտրվել կալանավորումը:
Կոմիտեից տեղեկացնում են, որ գործի նախաքննությունն ավարտվել է։ Քրեական գործը` մեղադրական եզրակացությամբ, ուղարկվել է դատարան:
Ավելի վաղ տեղեկացրել էինք, որ մայիսի 10-ին ողբերգական ավտովթար տեղի է ունեցել Արմավիրի մարզում։ Վարդանաշեն-Երասխահուն ավտոճանապարհի 1-ին կմ հատվածում բախվել են Երասխահուն գյուղի բնակիչ, 27-ամյա Իսլամ Շաբաբյանի վարած ВАЗ 2107 և Մարգարա գյուղի բնակիչ Հայկ Խաչատրյանի վարած BMW մակնիշի ավտոմեքենաները:
Երևան-Մասիս ճանապարհին ավտոմեքենան ընկել է կամրջից. 38–ամյա վարորդը տեղում մահացել է
Բախման հետևանքով 2 ավտոմեքենաները դուրս են եկել ճանապարհի երթևեկելի հատվածից և հայտնվել դաշտում: ВАЗ 2107-ը կողաշրջվել է: Վթարի հետևանքով 07-ի վարորդ Ի. Շաբաբյանն ու նրա ուղևորը՝ Երասխահուն գյուղի 66-ամյա բնակչուհի Ազնիվ Ուզոևան տեղում մահացել են։
Հիշեցնենք՝ վթարի պահին «Վազ 21074» մակնիշի ավտոմեքենայում է գտնվել Երասխահուն գյուղի 18-ամյա բնակչուհի Ռուզաննա Բաքոյանը։ Նա մարմնական վնասվածքներով տեղափոխվել է «Վաղարշապատ» բժշկական կենտրոն։ Ավելի ուշ պարզվել է, որ վթարի հետևանքով մահացել են Բաքոյանի ամուսինն ու սկեսուրը։