Վահրամ Մկրտչյանի փոխանցմամբ` ծրագրի հիմնական նպատակը վարկային միջոցներով ջրամբարի կառուցումն է։ Աշխատանքային նախագծերի պատրաստման ընթացքում նախարարության և խորհրդատուի կատարած մանրամասն ուսումնասիրությունները ցույց են տվել, որ անգամ 25 միլիոն խմ ծավալով ջրամբար կառուցելու դեպքում առաջանում է Ջրաձոր գյուղը վերաբնակեցնելու անհրաժեշտություն։
«Բացի այդ, շինարարական տեսանկյունից պարզվեց նաև, որ կա գյուղի շեպի` զառիվեր կողի մակերեսի անկայունության հետ կապված խնդիր, հետևաբար այդ ռիսկը նույնպես հաշվի է առնվել գյուղի վերաբնակեցման որոշում կայացնելիս։ Գյուղի վերաբնակեցումը նախատեսված էր դեռևս խորհրդային ժամանակաշրջանում, քանի որ ջրամբարի տարողությունը 60 միլիոն խմ ծավալի հասցնելու դեպքում ամբողջ գյուղը կմնար ջրային մակերեսի տակ»,– Sputnik Արմենիային ասաց նախարարի խորհրդականը։
Արի զբոսնենք Հայաստանով. էստի համեցեք` տեսնելու «հայկական Թաիլանդն» ու գործած հեքիաթները
Մկրտչյանի խոսքով` տեղի է ունեցել մի քանի հանդիպում ջրաձորցիների հետ ինչպես նախարարությունում, այնպես էլ համայնքում, խորհրդատուի ու նախարարության ներկայացուցիչների կողմից ներկայացվել է նախագիծը, եղել են լսումներ, որոնց արդյունքում կայացվել է համայնքն ամբողջությամբ տեղափոխելու որոշում, ինչը եղել է նաև ջրաձորցիների ցանկությունը։
Ըստ Մկրտչյանի` նույնիսկ բարելավվել են գյուղացիների համարժեք փոխհատուցման պայմանները, որովհետև հողերի ձեռքբերումն ու վերաբնակեցման պլանի մշակումն արդեն իսկ իրականացվել է գործընկեր KFW բանկի ընթացակարգերի ու միջազգային չափորոշիչների համաձայն։
«Շինարարության ավարտից հետո տարածաշրջանում կունենանք հրաշալի դիզայնով էկոգյուղ, ընդ որում` չենք կորցնի գյուղի էթնիկ ու մշակութային դրսևորումները։ Այդտեղ կկառուցվեն բոլորովին նոր չափորոշիչներով տներ, կապահովվեն շատ լավ կենսապայմաններ, այսինքն` Կապսի ջրամբարի կառուցումից հետո Ջրաձորը լինելու է մոդելային տարբերակով գյուղ»,– շեշտեց նախարարի խորհրդականը։
Անդրադառնալով ջրամբարի նշանակությանը` Մկրտչյանն ասաց, որ այն մեզ համար ունի ռազմավարական կարևորություն։ Ջրամբարի կառուցման արդյունքում հնարավոր կլինի պահպանել տարածաշրջանի էկոհամակարգը, բիոբազմազանությունը, բնապահպանական տեսանկյունից կունենանք ջրային ռեսուրսների հիմնավոր կառավարում, ջրամբարը կխթանի մարզի համայնքների զարգացումը` նպաստելով կենսամակարդակի բարելավմանը։
Նշենք, որ Ջրամբարի կառուցման ծրագիրն ընդհատվել էր 1988 թվականի երկրաշարժից հետո։
Արի զբոսնենք Հայաստանով. ինչեր են թաքնված Հովքի անանուն լճի հատակում