ԵՐԵՎԱՆ, 28 օգոստոսի – Sputnik.Հայաստանի շախմատի հավաքականը համաշխարհային առցանց օլիմպիադայի քառորդ եզրափակիչի առաջին խաղում պարտվեց Հնդկաստանի թիմին:
Հաղթանակ տոնեցին Աննա Սարգսյանն ու Էլինա Դանիելյանը: Լիլիթ Մկրտչյանը, Գաբրիել Սարգսյանն ու Հայկ Մարտիրոսյանը պարտվեցին, իսկ Լևոն Արոնյանը ոչ-ոքիով ավարտեց պարտիան:
Ինչպես հայտնում է armsport–ը, Հայկ Մարտիրոսյանի պարտիան այս պահին բողոքարկվում է, քանի որ Zoom-ի խնդիր է եղել, ինչի պատճառով նա չի կարողացել քայլ անել:
Հիշեցնենք` օգոստոսի 21-ին առաջին առցանց օլիմպիադայի մեդալների համար պայքարի մեջ մտան 40 ուժեղագույն հավաքական, որոնք բաժանված են 4 խմբի: Հայաստանի հավաքականը Ռուսաստանի, Ալժիրի, Անգլիայի, Բուլղարիայի, Եգիպտոսի, Մարոկկոյի, Ռումինիայի, Թուրքիայի և Խորվաթիայի հավաքականների հետ հայտնվել է միևնույն խմբում։
Յուրաքանչյուր խմբի հաղթողներն ուղղակիորեն կանցնեն քառորդ եզրափակիչ։ Քառորդ եզրափակիչի ևս 4 ուղեգիր կվիճարկեն այն թիմերը, որոնք ընտրական խմբերում կզբաղեցնեն երկրորդ և երրորդ տեղերը: Եզրափակիչը տեղի կունենա «նոկաուտ» սկզբունքով։
Հուլիսի 25-ին մեկնարկած օլիմպիադային մասնակցում է 163 թիմ: Նրանք խաղում են վեց խաղատախտակների վրա։ Յուրաքանչյուր թիմում ներգրավված են երկուական տղամարդ և կին, ինչպես նաև մինչև 20 տարեկան տղաներ և աղջիկներ։