ԵՐԵՎԱՆ, 24 օգոստոսի - Sputnik. «Լիդիան Արմենիան» զրպարտության համար հայցադիմում է ներկայացրել ՀՀ Ազգային ժողովի պատգամավոր Արման Բաբաջանյանի դեմ։ Տեղեկությունը հայտնում է «Լիդիան Արմենիայի» մամուլի ծառայությունը։
Հայցադիմումի պատճառն Արման Բաբաջանյանի կողմից հարցազրույցի ընթացքում Ամուլսարի ծրագրի մասին խոսելիս «Լիդիանի» վերաբերյալ «...կոռուպցիոն և հանցավոր ճանապարհով ձեռք բերված թույլտվություններ», «...նախկին կոռուպցիոն շղթաներով ամբողջությամբ կազմակերպած այդ հանցավոր գործարքը՝ Ամուլսարի, Լիդիանի․․․» և նման արտահայտություններ կիրառելն է:
Ընկերության որակմամբ՝ ընդգծված արտահայտությունները զրպարտություն են, ոչ մի աղերս չունեն իրականության հետ և նպատակ ունեն արատավորել ընկերության գործարար համբավը: «Ըստ էության կարող ենք փաստել, որ տարբեր շրջանակներ, քաղաքական ուժեր ներկայացնող մի շարք անհատներ այս ընթացքում «Լիդիան Արմենիայի» գործարար համբավն արատավորելու, Ամուլսարի ծրագրի վերաբերյալ հանրության շրջանում ապատեղեկատվություն տարածելու և բացասական տրամադրություններ ստեղծելու, կամ ինչ-որ խմբերի հաճոյանալու, քաղաքական դիվիդենտներ քաղելու նպատակով դիմել են հենց այս՝ զրպարտության միջոցին։ Նման հայտարարությունները ոչ միայն չեն ապացուցվել ավելի քան երկու տարվա ընթացքում, այլև առանձին դեպքերում դատարանի կողմից արդեն իսկ որակվել են որպես զրպարտություն»,-նշված է հաղորդագրության մեջ։
Փրկիր Ամուլսարը. Ազգային ժողովի բակում արտասովոր ակցիա անցկացվեց
«Լիդիան Արմենիան» շեշտում է , որ Արման Բաբաջանյանի պարագայում նման անպատասխանատու հայտարարությունների փաստն առավել մտահոգիչ է, քանի որ խոսքը ոչ թե ակտիվիստի կամ ցուցարարի մասին է, այլ ՀՀ օրենսդիր իշխանությունը ներկայացնող և օրինաստեղծ գործունեությամբ զբաղվող ԱԺ պատգամավորի։
Հիշեցնենք, որ Ամուլսարի շահագործման դեմ ակցիաները շարունակվում են։ Վերջերս խնդիրը նորից սրվեց, երբ օգոստոսի 3-ին «Լիդիան Արմենիա» ընկերությունը հանել էր դեպի Ամուլսար տանող ճանապարհին տեղադրված «Ամուլսարի պահապանների» վագոն–տնակներն ու դրանց փոխարեն իր պահնորդների վագոն-տնակները տեղադրել։ Մի քանի օրից տնակները հեռացվել էին։
«Լիդիան Արմենիան» աշխատատեղերի վերականգնման գործընթաց է սկսում
2018 թվականի հունիսից մի քանի տասնյակ մտահոգ քաղաքացիներ, որոնք կոչում են իրենց «Ամուլսարի պահապաններ», գիշեր-ցերեկ հերթապահում են՝ փակ պահելով դեպի լեռը տանող ճանապարհները։ Նրանք կարծում են, որ հանքի շահագործումը մեծ վնաս կհասցնի շրջակա միջավայրին:
Ամուլսարի ոսկու հանքը Հայաստանի երկրորդ խոշոր հանքավայրն է: ՀՀ կառավարությունը 2014-ին Ամուլսարի հանքի շահագործման իրավունք է տվել «Լիդիան Արմենիա» ՓԲԸ-ին, որը միջազգային «Lydian international» ընկերության դուստր ձեռնարկությունն է: