ԵՐԵՎԱՆ, 20 օգոստոսի - Sputnik. Իսրայելում Հայաստանի արտակարգ և լիազոր դեսպան Արմեն Սմբատյանը կարծում է, որ հայ և ադրբեջանցի ժողովուրդները պետք է շփման եզրեր գտնեն։ Իսրայելական ITON.TV հեռուստաալիքի եթերում նա պատմել է իր մի նախաձեռնության մասին, որն իրականացրել է, երբ Հայաստանի դեսպանն է եղել Ռուսաստանում։
Խոսքը վերաբերում է 2009 թվականի իրադարձություններին, երբ Սմբատյանը Ռուսաստանում Ադրբեջանի դեսպան Փոլադ Բյուլբյուլօղլիի ու մի խումբ հայ և ադրբեջանցի մտավորականների հետ այցելել է Արցախ, Երևան և Բաքու։
«Ես գործընկերներին առաջարկեցի շփվել հանուն ապագա սերունդների։ Մենք հարևաններ ենք և վաղ թե ուշ պետք է շփվենք», - ասել է Սմբատյանը։
Հայկական և ադրբեջանական կողմերի պատվիրակությունների կազմում ընդգրկվել են 7–ական մարդ՝ ռեկտորներ, ակադեմիկոսներ, որոնք քիչ թե շատ ճանաչել են միմյանց։
Պատվիրակությունը սկզբում մեկնել է Արցախ, ընդ որում` ադրբեջանական պատվիրակությունն Արցախի տարածք է մտել Ադրբեջանով, իսկ հայկական պատվիրակությունը ՝ Հայաստանի։ Հետո արդեն այցելել են Երևան և Բաքու, հանդիպումներ են կայացել Հայաստանի ու Ադրբեջանի նախագահների հետ։
Սմբատյանի խոսքով` ժողովուրդները հստակ հասկանում են, որ ղարաբաղյան խնդիրն իրենք չեն լուծելու, այլ ԵԱՀԿ Մինսկի խմբի երկրները, ուստի նրանց վրա է դրված երկու ազգերի միջև հարաբերությունները կարգավորելու առաքելությունը:
Նա բազմաթիվ պատերազմների օրինակներ է բերել` նշելով, որ այդ երկրների ժողովուրդներն այսօր շփվում են ու խաղաղ ապրում։
«Ժամանակն անցնում է, և մենք սկսում ենք հասկանալ, որ պետք է շփվել, կարելի է հայկական կոնյակ չսիրել ու չխմել, բայց պետք է հարգել ու քաղաքակիրթ ձևով շփվել հանուն մեր երեխաների», - ասել է Սմբատյանը:
Նրա կարծիքով` քանի դեռ կա մի սերունդ, որը ճանաչում է իրար ու մի քիչ հարգում, այդ ամենը պետք է փոխանցվի երիտասարդներին:
Ինչ վերաբերում է Սմբատյանի նախաձեռնությանը, ապա այն շարունակություն չի ունեցել։