Կարեն Վերանյանի դիտարկմամբ` այդ հարցը շահարկվում է, որովհետև դա քաղաքական հայտարարություն էր` պայմանավորված պաշտպանական ու անվտանգային բնույթի խնդիրներով, որ մենք ունեցանք Ապրիլյան քառօրյայի ընթացքում։ Ըստ նրա` թեև մեր զինանոցում կա նշված ժամանակաշրջանի զինտեխնիկա, սակայն հնարավոր չէ մշտապես կամ առաջիկա տարիների կտրվածքով հիմնվել նման տեխնիկայի վրա, քանզի փոխվում են պատերազմի վարման տրամաբանությունն ու փիլիսոփայությունը, մեթոդներն ու եղանակները, փոխվում են սպառազինության տեսակները, ինչը պայմանավորված է ռազմական ոլորտում նոր տեխնոլոգիաների առաջընթացով և դրանց ներդրմամբ։
«Եթե անընդհատ հիմնվենք 1980-ականների զինտեխնիկայի վրա, ապա չենք կարող համահունչ քայլել ռազմականացման արդի գործընթացների հետ, արդյունավետորեն չենք դիմակայի սպառնալիքներին, որոնք գալիս են Ադրբեջանից և Թուրքիայից։ Անթույլատրելի է խոսել 1980-ական թվականների զինտեխնիկայի կարողությունների ու հնարավորությունների մասին, այն համատեքստում, թե դրանք կարող են մեզ օգնել ներկա մարտահրավերները չեզոքացնելու համար»,– նշում է փորձագետը։
Կարեն Վերանյանի դիտարկմամբ` իհարկե կան զինատեսակներ, որոնք արդիականացվում են, որոնք վերջին տարիներին հայկական կողմը ձեռք է բերել և որոնք հագեցված են ժամանակակից տեխնոլոգիաներով։ Ըստ նրա` 1980–ականների արտադրության սպառազինության կիրառման միակ դրական կողմն այն է, որ մեր հրամանատարական կազմի հմուտ կառավարման շնորհիվ կարողացանք տավուշյան մարտական գործողությունների ժամանակ դրանց միջոցով ոչնչացնել ադրբեջանական ավելի թանկ ու ժամանակակից զինատեսակները։
«Ուղղակի ամոթ է». Սերժ Սարգսյանն անդրադարձավ տարածքներ հանձնելու մասին լուրերին
Ռազմական փորձագետն, ըստ այդմ, կարևորում է մարդկային կապիտալի դերը, զինվորական կադրերի արդյունավետ գործունեությունը, բայցևայնպես նշում է, որ 1980-ականների տեխնիկայով հնարավոր չէ հեռուն գնալ։ Կարեն Վերանյանն ամոթալի է համարում այն իրողությունը, որ տեղեկատվական ու քարոզչական տեսանկյունից է բարձրացվում զինատեսակների հնության հարցը և դառնում է շահարկման թեմա, մինչդեռ մեր զինված ուժերն իրենց զինանոցում ունեն նաև ժամանակակից տեխնիկա։
Նշենք, որ այսօր պաշտոնաթողությունից հետո հրավիրված առաջին ասուլիսի ժամանակ ՀՀ երրորդ նախագահ Սերժ Սարգսյանը, պատասխանելով մեր զինանոցում առկա 80–ականների զենքի վերաբերյալ իր ասած մտքի մասին հարցին, նշեց, որ այսօր էլ հայկական բանակի գրեթե ողջ զրահատեխնիկան 80-ականների է, այսօր էլ մեր զինանոցում կգտնեք անգամ 40-50-ական թթ-ի արտադրության զինատեսակներ: