ԵՐԵՎԱՆ, 19 օգոստոսի – Sputnik. ՀՀ երրորդ նախագահ Սերժ Սարգսյանն այսօր հրավիրված ասուլիսի ժամանակ, պատասխանելով հարցին, թե հայկական կողմն Ապրիլյանի օրերին դիզվառելիքի, զինամթերքի խնդիր ունեցե՞լ է, ասաց` զինամթերքի պակաս չի զգացվել։
«Ոչ միայն ապրիլյան պատերազմի, այլ նաև հիմա, մենք ունենք լավագույն սպառազինության կարիք։ Եվ ոչ միայն մենք, այլ բոլոր երկրների զինված ուժերը։ Բայց մենք ապրիլին առաջին անգամ օգտագործել ենք այնքան զինամթերք, ինչքան անհրաժեշտ են գտել հրամանատարները»,–ավելացրեց Սարգսյանը։
Նրա խոսքով` ճիշտ է, Ապրիլյան պատերազմի ժամանակ շատ ժամանակակից սպառազինությունների խնդիր է եղել, բայց դա խոչընդոտ չի հանդիսացել հաղթական գործողությունների համար։
Սարգսյանը հայտնեց, որ 2008-ին Իրանից դիզվառելիք, բենզին և հաց են ներկրել, որոնք ոչ միայն մինչև Ապրիլյան պատերազմը, այլ մինչև իր հրաժարականի օրը պետական ռեզերվում է եղել։ ՊՆ–ն նույնպես կուտակել և ունեցել է բավարար անձեռնմխելի պաշար։
Ապրիլյան պատերազմի օրերին Թուրքիայի ու Իսրայելի ռազմական մասնագետները Ադրբեջանում էին
Ինչ վերաբերում է Ապրիլյանի օրերին շրջանառվող տեսանյութին, որտեղ երևում էր, որ ադրբեջանական զորքն առաջ է գալիս, սակայն հայկական կողմում տալիս են չկրակելու հրաման, ապա Սարգսյանը նշեց` կրակելու հրաման տալիս են հրամանատարները։
«Չկրակել նշանակում է` հենց այնպես չկրակել, թող հակառակորդը մոտենա, հասնի խոցման ամենահարմար կետին ու նոր ոչնչացնել։ Ի՞նչ տարօրինակ բան կա, երբ հրամանատարն ասում է` չկրակել»,–ասաց Սարգսյանը։
ՀՀ երրորդ նախագահը վստահեցրեց` տևական ժամանակ Հայաստանը չի ունենալու լավագույն զինատեսակներ, բայց Ապրիլյանի օրերին եղածով ԶՈւ–ն կատարել է իր խնդիրները, և վստահ է, որ միշտ էլ այդպես է լինելու։
«Ուղղակի ամոթ է». Սերժ Սարգսյանն անդրադարձավ տարածքներ հանձնելու մասին լուրերին