ԵՐԵՎԱՆ, 18 օգոստոսի — Sputnik. «Ժողովուրդ» օրաթերթը գրում է, որ իրենց նոր մանրամասներ են հայտնի դարձել, թե ինչու է Սահմանադրական դատարանի դատավոր դառնալու որոշումից հրաժարվել կառավարության թեկնածու Վահրամ Ավետիսյանը:
Հիշեցնենք` երեկ` օգոստոսի 17–ին, Վահրամ Ավետիսյանը հայտարարություն տարածեց, որում ասվում էր, որ Ազգային ժողովում 80 ձայն ստանալը համարում է անիրատեսական, իսկ Սահմանադրական դատարանի դատավորի պաշտոնում ընտրվելու հետագա գործընթացին մասնակցելը` ոչ նպատակահարմար:
«Ինչպես հայտնի է, իշխող «Իմ քայլը» խմբակցության պատգամավորների մեծ մասը սվիններով էր ընդունել կառավարության թեկնածուին, և նրա հետ կապված տարբեր շրջանակներում դժգոհություն էր հասունացել»,–գրում է թերթը:
Նրանց տեղեկություններով` մի քանի նիստ անելուց և իրավիճակը տեսնելուց հետո իշխող խմբակցությունը հասկացել է, որ անհնար է դառնում կառավարել խմբակցությանը և այնպես անել, որ կողմ ձայներ ապահովեն, ու այդ մասին անկեղծորեն ասել են կառավարությանը:
«Ըստ այդմ արդեն նախկին թեկնածուին` Ավետիսյանին, խորհուրդ են տվել հրաժարվել, և վերջինս էլ համաձայնել է»,–գրում է թերթը:
«Ժողովուրդ» օրաթերթի տեղեկություններով` այժմ կառավարությունը նոր թեկնածու է փնտրում, սակայն իշխող թիմն ուզում է ամեն ինչ անել, որ նա չլինի հենց արդարադատության նախարար Ռուստամ Բադասյանի թեկնածուն:
«Մի մասի համար նույնիսկ նախընտրելի է արդարադատության նախկին նախարար Արտակ Զեյնալյանի թեկնածությունը: Միևնույն ժամանակ ընդգծենք, որ Վահրամ Ավետիսյանի տապալումը ՍԴ դատավոր Վահե Գրիգորյանի լոբբինգի արդյունքն էր»,-գրում է թերթը։
Հիշեցնենք` հուլիսի 23-ին հայտնի դարձավ, որ ՀՀ կառավարությունը Սահմանադրական դատարանի դատավորի թափուր պաշտոնի համար առաջադրել է ԵՊՀ Քաղաքացիական իրավունքի ամբիոն վարիչ, իրավաբանական գիտությունների դոկտոր, պրոֆեսոր Վահրամ Ավետիսյանի թեկնածությունը:
Վահրամ Ավետիսյանն իրավագիտության դոկտոր, պրոֆեսոր է, վճռաբեկ դատարանի քրեական պալատի նախկին նախագահ, Դատավորների միության նախկին փոխնախագահ Դավիթ Ավետիսյանի որդին։
«Իմ քայլը» քննարկել է ՍԴ դատավորների հարցը. մեծամասնությունը դեմ է ՀՀ նախագահի թեկնածուին
Հուլիսի 30-ին` «Իմ քայլի» պատգամավորների հետ հանդիպումւից հետո, նա հայտնել էր, որ չի պատրաստվում լինել դատական համակարգի քավության նոխազ։
Ավելի վաղ` հունիսի 30-ին ՀՀ ԱԺ-ն իր արտահերթ նստաշրջանում ընդունեց ՀՀ Սահմանադրական դատարանի մասին Սահմանադրական օրենքում և մի շարք այլ օրենքներում փոփոխություններ կատարելու մասին օրենքների նախագծերը: Դրանցով կասեցվում են 12 տարի պաշտոնավարած ՍԴ 3 դատավորների լիազորությունները, իսկ ՍԴ նախագահ Հրայր Թովմասյանը, որի պաշտոնավարման 12 տարին չի լրացել, շարունակում է աշխատել ՍԴ դատավորի կարգավիճակում։
ՀՀ նախագահ Արմեն Սարգսյանը ՍԴ դատավորի թեկնածու է առաջադրել Արթուր Վաղարշյանին, Դատավորների ընդհանուր ժողովը` Երվանդ Խունդկարյանին։ Բոլոր թեկնածուներին պետք է ընտրի Ազգային ժողովը 3/5-րդ ձայներով: