ԵՐԵՎԱՆ, 18 օգոստոսի — Sputnik. Կորոնավիրուսի դեմ չինական պատվաստանյութը կարող է շուկայում հայտնվել այս տարվա դեկտեմբերի վերջին: Այս մասին հայտարարել է Sinopharm պետական կորպորացիայի տնօրենների խորհրդի նախագահ Լյու Ցզինժենը, փոխանցում է Reuters-ը։
Այս պահին ԱՄԷ-ում անցկացվում է դեղամիջոցի փորձարկման երրորդ փուլը։ Դրան մասնակցում է մոտ 15 հազար մարդ և օգտագործվում է երկու տեսակի պատվաստանյութ։ Sinopharm-ի նախագահի խոսքով` ընկերությունը հույս ունի մարդկանց վրա վերջին փորձարկումներն ավարտել մոտ երեք ամսվա ընթացքում: Ավելի վաղ հայտարարվում էր, որ պատվաստանյութը պատրաստ կլինի 2021 թվականից ոչ շուտ:
Լյուն հիշեցրել է, որ պատվաստանյութի իմունոգենության վերաբերյալ հետազոտություններն անցկացվում են փետրվարի 16-ից: Ի սկզբանե այն փորձարկել են փորձարարական կենդանիների յոթ տեսակների վրա, այդ թվում ՝ սպիտակ առնետների, մկների, ծովային խոզերի և ճագարների: Դրանից հետո պատվաստվել է մարդկանց մի փոքր խումբ, իսկ հետո սկսվել են կլինիկական փորձարկումները։
Ռուսաստանում սկսվել է կորոնավիրուսի դեմ պատվաստանյութի արտադրությունը
Նշենք, որ հունիսին մարդկանց վրա դեղամիջոցի հաջող փորձարկումների մասին հայտարարել էր China National Biotec Group (CNBG) չինական ընկերությունը: Դրական արդյունք ցույց տվեցին փորձարկվող երկու պատվաստանյութն էլ։