ԵՐԵՎԱՆ, 18 օգոստոսի - Sputnik. Երևանի ընդհանուր իրավասության դատարանում դատավոր Մնացական Մարտիրոսյանի նախագահությամբ ընթացող ԵԿՄ նախկին նախագահ Մանվել Գրիգորյանի կնոջ՝ Նազիկ Ամիրյանի գործով դատական նիստը հետաձգվեց։ Նիստին Ամիրյանը ներկա չէր։
«Ամիրյանի` դատական նիստին ներկա չգտնվելու հանգամանքը պայմանավորված է կորոնավիրուսով։ Ուստի միջնորդում ենք նիստը հետաձգել մինչև արտակարգ դրության ավարտը»,–ասաց Ամիրյանի պաշտպան Լևոն Բաղդասարյանը։
Գործով դատախազներն նշեցին, որ հիմնավոր չէ արտակարգ դրությունը պատճառ բերել նիստերին ներկա չլինելու համար։ Ըստ դատախազի` այժմ դատական գործերն արդեն իսկ բնականոն հունով ընթանում են, և, եթե խոսքը գնար սահմանափակումների շրջանում նիստերին ներկա չլինելուն, ապա այլ հարց կլիներ։
Դատավոր Մնացական Մարտիրոսյանն էլ հետաքրքրվեց` արդյո՞ք Ամիրյանն առողջ է, ինչին ի պատասխան պաշտպանը վստահեցրեց՝ այո։ Դատավորն արձանագրեց, որ ամբաստանյալի բացակայության պայմաններում հնարավոր չէ նիստն անցկացնել, ուստի այն հետաձգվեց մինչև սեպտեմբերի 22-ը, ժամը 12-ը։
Մանվել Գրիգորյանի կինն ամուսնու առողջական վիճակի համար մեղադրում է դատախազությանը
Մարտիրոսյանի խոսքով` կարող է իրավաչափ չդիտվել այն, որ ամբաստանյալը ներկա չէ նիստին զուտ այն պատճառով, որ արտակարգ դրություն է հայտարարված, բայց նա առողջական խնդիրներ չունի։ Նա փոխանցեց ծանուցել Ամիրյանին` հաջորդ նիստին ներկայանալու։
Ի դեպ, սեպտեմբերի 22-ին նշանակվել է նաև Մանվել Գրիգորյանի դեմ դատական նիստը։
Հիշեցնենք, որ ըստ դատախազության հայտարարության` Նազիկ Ամիրյանն իր կազմակերպած մեքենայությունների արդյունքում, լուծարային կառավարիչի օժանդակությամբ, խաբեությամբ հափշտակել է «Հայապակի» ՓԲԸ-ի` առանձնապես խոշոր չափերով՝ 571.166.000 ՀՀ դրամ արժողությամբ պետական գույքը։
Ամիրյանը ձերբակալվել էր 2018թ. հունիսի 27-ին։ Ավելի ուշ նրա նկատմամբ խափանման միջոցը փոխարինվել էր չհեռանալու մասին ստորագրությամբ։
ՄԻՊ աշխատակիցներն առանձնազրույց են ունեցել Մանվել Գրիգորյանի և նրա փաստաբանների հետ