ԵՐԵՎԱՆ, 17 օգոստոսի – Sputnik. ՍԴ դատավորի թեկնածու Վահրամ Ավետիսյանը ՍԴ–ում դատավոր ընտրվելու առնչությամբ իր ներկայացրած դիմումը հետ է կանչել։ Ավետիսյանն իր որոշման մասին գրել է Facebook սոցցանցի իր էջում։
««Իմ քայլի» պատգամավորների հետ հանդիպումից և հետագա քննարկումներից ինձ համար ակնհայտ դարձավ, որ պատգամավորների մի մասի` ՍԴ–ի դերակատարության, ՍԴ դատավորի ապաքաղաքականացվածության և անկախության վերաբերյալ մոտեցումներն ու պատկերացումներն իմ մոտեցումներին և պատկերացումներին համահունչ չեն, իսկ որոշ դեպքերում նաև ինձ համար անընդունելի։ Հետևաբար ԱԺ–ում 80 ձայն ստանալը համարում եմ անիրատեսական»,–գրել է նա։
Նա նշել է, որ պետության գերխնդիրներից է անկախ, հաշվետու, կանխատեսելի արդարադատություն իրականացնող, հասարակության մեջ հեղինակություն վայելող և պրոֆեսիոնալ դատավորներով համալրված դատական իշխանության կայացումը: Խնդիր, առանց որի լուծման պետությունը և հասարակությունը զարգացման որևէ հեռանկար չունեն: Այդ խնդիրների լուծման գործում ներդրում ունենալու ցանկությամբ է պայմանավորված եղել Ավետիսյանի կողմից Սահմանադրական դատարանի դատավորի թեկնածու առաջադրվելու առաջարկը ընդունելը։ Սակայն «Իմ քայլի» պատգամավորների հետ հանդիպումից և քննարկումներից հետո աննպատակահարմար է համարում ՍԴ դատավորի պաշտոնում ընտրվելու հետագա գործընթացին մասնակցելը։
Նա հայտնել է, որ է «Սահմանադրական դատարանի դատավորի պաշտոնում ընտրվելու մասին» համաձայնությունս հետ կանչելու մասին դիմումը այսօր ներկայացրել է Ազգային ժողովի նախագահին։ Նա շնորհակալություն է հայտնել կառավարությանը` իր թեկնածությունը Սահմանադրական դատարանի դատավորի պաշտոնում առաջադրելու համար։ ՀՀ–ում իրականացվող դատաիրավական բարեփոխումներին էլ մաղթել է բարեհաջող ընթացք՝ ի շահ ՀՀ քաղաքացու և մեր հայրենիքի։
Հիշեցնենք` հուլիսի 23-ին հայտնի դարձավ, որ ՀՀ կառավարությունը Սահմանադրական դատարանի դատավորի թափուր պաշտոնի համար առաջադրել է ԵՊՀ Քաղաքացիական իրավունքի ամբիոն վարիչ, իրավաբանական գիտությունների դոկտոր, պրոֆեսոր Վահրամ Ավետիսյանի թեկնածությունը:
Վահրամ Ավետիսյանն իրավագիտության դոկտոր, պրոֆեսոր է, վճռաբեկ դատարանի քրեական պալատի նախկին նախագահ, Դատավորների միության նախկին փոխնախագահ Դավիթ Ավետիսյանի որդին։
Հուլիսի 30-ին` «Իմ քայլի» պատգամավորների հետ հանդիպումւից հետո, նա հայտնել էր, որ չի պատրաստվում լինել դատական համակարգի քավության նոխազ։
Ավելի վաղ` հունիսի 30-ին ՀՀ ԱԺ-ն իր արտահերթ նստաշրջանում ընդունեց ՀՀ Սահմանադրական դատարանի մասին Սահմանադրական օրենքում և մի շարք այլ օրենքներում փոփոխություններ կատարելու մասին օրենքների նախագծերը: Դրանցով կասեցվում են 12 տարի պաշտոնավարած ՍԴ 3 դատավորների լիազորությունները, իսկ ՍԴ նախագահ Հրայր Թովմասյանը, որի պաշտոնավարման 12 տարին չի լրացել, շարունակում է աշխատել ՍԴ դատավորի կարգավիճակում։
ՀՀ նախագահ Արմեն Սարգսյանը ՍԴ դատավորի թեկնածու է առաջադրել Արթուր Վաղարշյանին, Դատավորների ընդհանուր ժողովը` Երվանդ Խունդկարյանին։ Բոլոր թեկնածուներին պետք է ընտրի Ազգային ժողովը 3/5-րդ ձայներով: