ԵՐԵՎԱՆ, 16 օգոստոսի - Sputnik. Ուրբաթ` օգոստոսի 14–ին մահացած Վալենտինա Լեգկոստուպովան ստեղծագործական առումով դավադրությունների զոհ է դարձել։ «Կոմսոմոլսկայա Պրավդա» թերթի փոխանցմամբ՝ նման կարծիք է հայտնել կոմպոզիտոր ու երգչուհու ընկեր, Ռուսաստանի Հանրային պալատի ԶԼՄ-ների հարցերով հանձնաժողովի փորձագետ Վադիմ Մանուկյանը։
80-ականների վերջին տարիները Լեգկոստուպովայի աստղային տարիներն էին, նա տարեկան 120 համերգ էր տալիս։ Սակայն հետո հանկարծակի անհետացավ տեսադաշտից, նրան այլևս հեռուստատեսության կամ ռադիոյի եթերի չէին հրավիրում։ Այդ ամենը չէր կարող չանդրադառնալ երգչուհուն հոգեկան վիճակի վրա և հետք չթողնել հետագա ամբողջ կյանքի վրա։ Նա մինչև վերջ չէր կարողանում մոռանալ այն մարդուն, որին իր ձախողված կարիերայի մեղավորն էր համարում։
«Վալյայի ստեղծագործական ուղին ավարտվեց ինչ-որ դավադրությունների պատճառով։ Նա հրապարակայնորեն խոսում էր այդ մասին, բայց անուններ չէր տալիս։ Թեև բոլորս էլ լավ գիտեինք՝ ինչ լեդիի մասին էր նա խոսում՝ Ալլա Պուգաչովայի», - ասել է Վադիմը։
ԶԼՄ-ներն ակտիվորեն լուրեր էին տարածքում, որ Ալլա Պուգաչովան այդ քայլով վրեժ է լուծել Վլադիմիր Պրեսնյակովի հետ սիրավեպի համար․ Պրեսնյակովն այդ ժամանակ արդեն ամուսնացած էր Պուգաչովայի դստեր՝ Կրիստինա Օրբակայտեի հետ։
Մանուկյանի խոսքով՝ ի տարբերություն այլ արտիստների, Լեգկոստուպովան չէր ուզում հանրային դարձնել այդ խոսակցությունները։
Մանուկյանը նշել է, որ երգչուհին նպատակահարմար չէր գտնում խոսել այդ թեմայով, բայց ծանր էր տանում իրեն մշակույթի ոլորտից «ջնջելու» փաստը։
Խոսակցությունները, թե երգչուհուն ալկոհոլի ուժեղ ազդեցության տակ են գտել, մեղմ ասած, զարմացրել են Մանուկյանին։ Նրա խոսքով՝ Լեգկոստուպովան երբեք ալկոհոլը չէր չարաշահում։
Վադիմ Մանուկյանը չի հավատում նաև այն լուրերին, թե երգչուհուն որևէ մեկը սպանել է։ Փորձագետը կարծում է, որ դժբախտ պատահար է տեղի ունեցել։
«Կարծում եմ, որ դա ինչ-որ ահավոր դժբախտ պատահար էր։ Քննիչներն էլ, որքան հասկանում եմ, հակված են այդ վարկածին», - ասել է նա»։
Պուգաչովային օգնություն պետք չէ․ Գալկինն ասել է՝ ինչի հաշվին են իրենք ապրում
Հիշեցնենք՝ օգոստոսի 11-ին հայտնի է դարձել, որ Լեգկոստուպովային գլխի վնասվածքով հիվանդանոց են տեղափոխել։ ԶԼՄ-ները հայտնում էին, որ նա թմրանյութերի ազդեցությունից բուժող կլինիկայում է հայտնվել՝ ոչ սթափ վիճակում, ձեռքերին ու ոտքերին արյունազեղ ուռուցքներով։ Ամուսինն ասել է, որ նա լոգարանում ընկել է։ Այժմ ոստիկանությունն այդ վարկածը քննում է որպես հիմնական։ Երգչուհին 54 տարեկան էր։