Դատապարտելով Սուրբ Փրկիչ և Սուրբ Քառասուն մանկանց եկեղեցիներին կից գտնվող հայկական գերեզմանատան դեմ ուղղված վանդալիզմի դրսևորումը` Բագրատ Էստուկյանն ընդգծում է, որ հայերի և այլազգիների գերեզմանների թալանն ու գանձախուզության դեպքերի ակտիվացումը պայմանավորված չէ միայն վերջին շրջանի ժամանակագրությամբ, այլ ունի վաղեմի պատմություն։
«Դեռ 1915 թվականի տեղահանությունից ու աքսորից առաջ շատ հայեր իրենց ունեցվածքը պահեցին կա՛մ գերեզմանատներում, կա՛մ եկեղեցիների հիմքերի տակ։ Այդ հանգամանքը շատերին խրախուսեց, որպեսզի նշված վայրերում իրականացնեն գանձախուզական աշխատանքներ, պեղումներ։ Այդ գործընթացը հարատևորեն շարունակվում է, հետևաբար հայկական կոթողների ու գերեզմանատների ավերածության լուրերն այլևս զարմանք չեն պատճառում»,– նշում է «Ակոսի» խմբագրապետը։
Բագրատ Էստուկյանի գնահատմամբ` Թուրքիայի պատկան մարմինները գործուն քայլեր չեն իրականացնում, որպեսզի գտնեն մեղավորներին ու ենթարկեն պատասխանատվության, և գանձախույզները նույնիսկ համացանցի միջոցով տեղեկություններ են տարածում, խորհուրդներ, տալիս իրար, որտեղ և ինչպես պետք է գանձ փնտրել։ Մեծ պահանջարկ ունեն ազատ վաճառքում առկա այնպիսի սարքեր, որոնց միջոցով կարելի է գետնի տակ թաղված մետաղյա իրեր հայտնաբերել։ Խմբագրապետի տեղեկացմամբ` նույնիսկ եթե բողոքներ են լինում և հանցագործները դեպքի վայրում բռնվում են, միևնույն է, նրանք թեթև պատիժ են կրում։
«Թուրքական հասարակությանը միշտ հետաքրքրում է հարցի առեղծվածային կողմը, գանձերին առնչվող պատմությունները, բայց կոթողների ավերածությունների նկատմամբ թուրքերն անտարբեր են։ Հասարակությանը թերևս ցավ է պատճառում միայն իր սրբավայրերի դեմ իրականացված վանդալիզմը, մինչդեռ ավելի քան 2000 հայկական եկեղեցի ավերվել են հենց պետության կարգադրությամբ»,– նշում է խմբագրապետը։
Էստուկյանի կարծիքով` Թուրքիայի հայկական համայնքի միակ բարեբախտությունը խորհրդարանում Կարո Փայլանի պես պատգամավոր ունենալն է, որն ամեն տեսակի ոտնձգության դեմ իր ձայնն է բարձրացնում` ներկայացնելով առարկություններ և հարցումներ ուղղելով իշխանություններին, թեև շատ բան, ցավոք սրտի, անցնում է ապարդյուն։
Մշակութային վանդալիզմ. թուրք երգչուհին երգում է Անիի Մայր տաճարում. տեսանյութ
Հիշեցնենք` Թուրքիայի մայրաքաղաք Անկարայի Սինջան թաղամասում գտնվող հայկական Սուրբ Փրկիչ և Սուրբ Քառասուն մանկանց եկեղեցիներին կից գտնվող հայկական գերեզմանոցն օրերս ավերել են, աճյունները դուրս են բերվել շիրիմներից, ամենուր մարդկային ոսկորներ են ցրիվ տրված եղել։