Գևորգ Էմին–Տերյանը կարծում է, որ ԵՊՀ կառավարման բարձրագույն մարմնի` հոգաբարձուների խորհրդի կազմը հաստատելու գործընթացի ձգձգման պատճառը ենթադրաբար եղել է այն, որ ԿԳՄՍ նախարարությունը փնտրում էր ճանաչված մարդկանց, որովհետև կան պահանջներ, որոնք նախորդ անգամ այնքան էլ չէին բավարարվել, հետևաբար այս անգամ ավելի ուշադիր են վերաբերվել թե՛ կանոնադրությանը, թե՛ օրենքին` համապատասխան մարդկանց ներգրավելով։ Ըստ նրա` խախտումը միայն այն է, որ կազմի հետ կապված հարցը պետք է լուծվեր 30–օրյա ժամկետում, սակայն ձգձգվեց մի քանի ամիս։
«Ես լիահույս եմ, որ նոր խորհուրդը կգա աշխատելու, որովհետև մենք տեսանք` նախորդ խորհուրդը, որը նոր էր կազմավորվել, նախագահի շուրթերով հնչեցրեց խոստումներ, որ ամսական լինելու էր գոնե մեկ նիստ, որ անընդհատ վերահսկողություն և կապ էր լինելու հոգաբարձուների խորհրդի, ռեկտորատի ու գիտխորհրդի միջև, սակայն խոստումները, ցավոք սրտի, ի կատար չածվեցին»,– Sputnik Արմենիային ասաց ԵՊՀ ռեկտորի մամուլի խոսնակը։
Էմին–Տերյանը հիշեց նաև այն նիստերը, որոնց ընթացքում եղան ռեկտորի հրաժարականի պահանջներ, և նախորդ խորհուրդը չկարողացավ լուծել իր առջև ծառացած խնդիրները։ Ռեկտորի մամուլի խոսնակը հուսով է, որ հոգաբարձուների նոր կազմը չի խուսափի իր վրա դրված պատասխանատվությունից և նրա աշխատանքը չի ավարտվի միայն բյուջե հաստատելով։
Անդրադառնալով զուտ կազմին, մասնավորապես դասախոսների և ուսանողների թվաքանակի հարաբերակցությանն առնչվող հարցին` Էմին–Տերյանը նշեց, որ նոր օրենքով լիազոր մարմինը` ԿԳՄՍ նախարարությունն ունենալու է բացարձակ մեծամասնություն և թելադրելու է ամեն ինչ, իսկ ներկայիս կանոնադրության համապատասխան` հոգաբարձուների խորհուրդը քիչ թե շատ ապահովում է բուհի ինքնավարությունը, որովհետև այնտեղ համալսարանի դասախոսներն ու ուսանողները ներկայացված են մեկ քառորդական մասով։
Ըստ Էմին–Տերյանի` քննարկումներ են եղել Բարձրագույն կրթության և գիտության օրենքի նախագծի վերաբերյալ, որում որոշ դրույթներ ուղղակի խախտում են ՀՀ Սահմանադրությունը և բուհին զրկում են ինքնավարությունից։
Հիշեցնենք, որ ՀՀ վարչապետ Նիկոլ Փաշինյանը օգոստոսի 9-ին հաստատեց ԵՊՀ կառավարման բարձրագույն մարմնի` հոգաբարձուների խորհրդի կազմը` բաղկացած 32 անդամից։