ԵՐԵՎԱՆ, 31 հուլիսի – Sputnik. ԱԱԾ նախկին տնօրեն Արթուր Վանեցյանը ՀՀ երկրորդ նախագահ Ռոբերտ Քոչարյանի հետ չի հանդիպել։ ԱԱԾ–ից դուրս գալուց հետո լրագրողների հետ զրույցում ասաց Վանեցյանը` անդրադառնալով մամուլում շրջանառվող լուրերին, թե վերջին օրերին հանդիպումներ է ունենում քաղաքական տարբեր ուժերի հետ, այդ թվում` Քոչարյանի։
«Չեմ բացառում, որ առաջիկայում հանդիպում լինի քաղաքական բոլոր ուժերի, անհատների, այդ թվում` Ռոբերտ Քոչարյանի, Սերժ Սարգսյանի, Լևոն Տեր–Պետրոսյանի հետ»,–ասաց Վանեցյանը։
Հարցին, թե խոսքն այն Սերժ Սարգսյանի և Լևոն Տեր–Պետրոսյանի մասին է, որոնց նա ԱԱԾ տնօրեն լինելու ժամանակ մեղադրում էր երկիրը թալանելու և կոռուպցիայի մեջ, Վանեցյանը պատասխանեց, որ հարցը տեղին չէ։ Նրա մեկնաբանմամբ` քաղաքական գործընթացները ենթադրում են հանդիպումներ քաղաքական բոլորի ուժերի և քաղաքականության մեջ գործունեություն ծավալող անձանց հետ։
Մեկ այլ հարցի, թե Քոչարյանն ասել էր` չի բացառվում, որ ժողովուրդը երկրորդ անգամ փողոց փակելով նորից իշխանություն փոխի, արդյո՞ք Վանեցյանը կարծում է, որ ընդդիմությունը կկարողանա համախմբվել, ԱԱԾ նախկին տնօրենը պատասխանեց` առաջիկայում լինելու են շատ ակտիվ քաղաքական գործընթացներ։
«Կլինեն ակտիվ քաղաքական պրոցեսներ, որի ընթացքում որոշ զարգացումներ կլինեն։ Երկիրը գտնվում է բարդ և ծանրագույն իրավիճակում, քանի որ իշխանությունները ձախողել են բոլոր ուղղություններով աշխատանքները` առողջապահական, տնտեսական և այլն»,–ասաց Վանեցյանը։
ՀՅԴ ներկայացուցիչը հանդիպել է Վանեցյանի ու Ծառուկյանի հետ
Հիշեցնենք, որ ԱԱԾ նախկին տնօրենը քիչ առաջ հայտնել էր, որ այսօր իրեն ԱԱԾ էին հրավիրել «անհեթեթ» գործի շրջանակում, որով նա որևէ կարգավիճակ չունի։
Նրա խոսքով` քրեական գործ հարուցված չէ, իրեն նյութերի նախապատրաստման փուլում են հրավիրել ԱԱԾ։ Վանեցյանը հրաժարվել է բացատրություն տալ։ Խոսքը վերաբերում է մի դեպքի, երբ 2018-ին ԱԱԾ աշխատակիցներից մեկը վերականգնվել է աշխատանքի, սակայն, ըստ ԱԱԾ–ի, նման բան չպետք է տեղի ունենար։
Արթուր Վանեցյանն ու նրա ծնողները դիմել են դատարան