Մինչ Ստամբուլում գտնվող Սուրբ Սոֆիայի տաճարում այսօր նամազ էր անցկացվում, Կիպրոսում և Հունաստանի որոշ քաղաքներում սգո զանգեր են ղողանջել։
Ստամբուլի Սուրբ Սոֆիայի տաճարը մզկիթի վերածելու կապակցությամբ Կիպրոսում և Հունաստանի որոշ քաղաքներում սգո զանգերը ղողանջել են, որով արտահայտել են իրենց բողոքը կատարվածի առնչությամբ։
Կիպրոսի արքեպիսկոպոս Խրիզոստոմի որոշմամբ՝ սգո զանգերը սկսել են ղողանջել տեղական ժամանակով ժամը 12։00-ից`5 րոպեն մեկ։ Նա այս քայլը բացատրել է Սուրբ Սոֆիայի տաճարը մզկիթի վերածելու Թուրքիայի կամայական, անթույլատրելի և հանցավոր քայլով։
Հունաստանի Արքեպիսկոպոս Հիերոնիմը հայտարարել է, որ Սուրբ Սոֆիայի տաճարը որպես մզկիթ գործելու առաջին օրն ուղղափառության, քրիստոնեության և հելլենիզմի համար տառապանքների օր է։
Հիշեցնենք՝ հուլիսի 10-ին Թուրքիայի Պետական խորհուրդը չեղարկել էր Սուրբ Սոֆիան թանգարան դարձնելու մասին 1934թ-ի որոշումը։ Նույն օրը երկրի նախագահ Ռեջեփ Թայիփ Էրդողանը ստորագրել էր Սուրբ Սոֆիան մզկիթ դարձնելու ու հուլիսի 24-ից այնտեղ մուսուլմանական արարողություններ անցկացնելու որոշումը։
2019թ-ի մարտին Թուրքիայի ղեկավարը հայտարարել էր, որ տաճարի կարգավիճակի փոփոխությունը մուսուլմանների անունից պատասխան է Իսրայելում ԱՄՆ գործողություններին։ Այդպիսով Թուրքիան պատասխանում է ամերիկյան պետությանը, որն աջակցում է Իսրայելի ինքնիշխանությանը Հոլանի բարձունքներում։
Հայ առաքելական եկեղեցին դատապարտում է Սուրբ Սոֆիայի տաճարը մզկիթի վերածելու որոշումը
Սուրբ Սոֆիայի տաճարը կառուցվել է Հուստինիանոս կայսեր հրամանով՝ մ․թ․ 6-րդ դարում։ Կոնստանդնուպոլիսը գրավելուց հետո թուրքերն այն մզկիթ էին դարձրել, բայց 1935թ-ին ժամանակակից թուրքական պետության հիմնադիր Քեմալ Աթաթուրքը սրբավայրին թանգարանի կարգավիճակ էր տվել։