ԵՐԵՎԱՆ, 21 հուլիսի — Sputnik. ԵԱՀԿ Մինսկի խումբը շարունակում են մեծ ներդրում ունենալ խաղաղ գործընթացում։ Նման կարծիք է հայտնել ՀՀ արտաքին գործերի նախարար Զոհրաբ Մնացականյանը` France 24 լրատվամիջոցին տված հարցազրույցում` պատասխանելով հարցին, թե չի՞ կարծում, որ պետք է վերանայել բանակցային ձևաչափը, քանի որ Մինսկի խմբի համանախագահությունը կարծես թե չի աշխատում։
«Ես չեմ կարող համաձայնել այն կարծիքի հետ, որ այն չի աշխատում: Այն գործել է շատ արդյունավետ, և ունի շատ ամուր հիմքեր, շատ ամուր հարթակ, որտեղ բոլոր երեք երկրները՝ Ռուսաստանը, Ֆրանսիան և ԱՄՆ-ը, աշխատում են շատ ներգրավված կերպով: Ես այն համարում եմ շատ դրական դերակատարություն և չեմ տեսնում որևէ պատճառ այն փոխելու»,–ասել է Մնացականյանը։
Նախարարից հետաքրքրվել են նաև, թե արդյո՞ք երկու երկրների առաջնորդների հանդիպումը վճռական դեր կխաղա՞ լարվածության թուլացման և փակուղուց դուրս գալու հարցում: Ի պատասխան Մնացականյանը նշել է, որ ղեկավարների միջև հանդիպումները գործընթացի մաս են, դրանք եղել են նախկինում և կարծում է` վերստին կլինեն: Սակայն, ըստ նախարարի, այս հանդիպումները պետք է զգուշորեն նախապատրաստվեն, քանի որ Հայաստանը ձգտում է ստեղծել առաջընթացի լավ հիմքեր:
Նա շեշտել է, որ կա արտգործնախարարների անմիջական ներգրավվածություն, որոնք բանակցում են, նախապատրաստում առաջնորդների աշխատանքը:
«Մենք կշարունակենք աշխատել բանակցություններում արդյունքի հասնելու համար։ Ղեկավարների հանդիպումը տեղի կունենա միայն այն ժամանակ, երբ մենք լավ հիմքեր կնախապատրաստենք նմանօրինակ հանդիպման համար, որպեսզի բանակցություններում առաջընթաց գրանցվի»,–ասել է նախարարը։
Սահմանային լարվածության պատճառահետևանքային կապը դեռ վերացված չէ
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 21-ի պաշտոնական տվյալներով՝ Ադրբեջանն ունի 13 զոհ, վիրավորների մասին որևէ բան չի հաղորդվում, իսկ հայկական կողմը 4 զոհ ունի, 36 վիրավոր (ևս մեկը խաղաղ բնակչությունից)։