ԵՐԵՎԱՆ, 16 հուլիսի - Sputnik. Թուրքիայի մեջլիսի հայ պատգամավոր Կարո Փայլանը Թուրքային մեղադրում է Հայաստանի և Ադրբեջանի միջև ծագած կոնֆլիկտը բորբոքելու մեջ։
«Էրդողանը և իր նախարարները, իրենց հայտարարություններով Հայաստանի և Ադրբեջանի միջև ծագած կրակի վրա յուղ են լցնում»,-գրել է նա։
Փայլանի խոսքով՝ հարևան երկրների միջև ծագած լարվածությունը պետք է լուծվի անկողմնակալ ու արդար ձևով։
«Ազգայինի ու կրոնականի մոլի կողմնակիցները վնասում են տարածաշրջանի խաղաղությունը»,-եզրափակել է Փայլանը։
Հիշեցնենք՝ Թուրքիայի նախագահ Ռեջեփ Թայիփ Էրդողանը խստորեն դատապարտել էր «Ադրբեջանի նկատմամբ Հայաստանի կատարած հարձակումը»:
Ասել էր, թե իրենք «մտահոգված են, որ Լեռնային Ղարաբաղի «օկուպացիայից» ի վեր այս տարածաշրջանում առկա լարվածությունը Հայաստանի հանդուգն և պարբերական հարձակումների հետևանքով բախման է վերածվել»:
Թուրքիայի նախագահը աջակցություն էր հայտնել «բարեկամական Ադրբեջանին»՝ շեշտելով, որ Թուրքիան երբեք չի վարանի դիմակայելու Ադրբեջանի իրավունքի, օրենքի, տարածքի նկատմամբ ամեն տեսակ հարձակմանը։
Հիշեցնենք, որ հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 15-ի պաշտոնական տվյալներով՝ Ադրբեջանն ունի 11 զոհ, իսկ հայկական կողմը` 4 զոհ, 10 վիրավոր։
Հուլիսի 16–ի առավոտյան ՊՆ–ն հայտնեց, որ գիշերը՝ ժամը 03:40-ի սահմանում, ՀՀ ԶՈւ դիրքապահները հակառակորդի շարժ են նկատել։ Անցնելով շրջանաձև պաշտպանության՝ հայկական ստորաբաժանումները կանխել են հակառակորդի դիվերսիոն ներթափանցման փորձը։ Թեժ մարտից հետո հակառակորդը, կորուստներ կրելով, հետ է շպրտվել։ Այնուհետև ադրբեջանական ստորաբաժանումները ժամը 05:20-ին սկսել են հրետակոծել Այգեպար և Մովսես գյուղերը՝ կիրառելով ականանետ և Դ-30 հաուբից:
Պաշտպանության նախարար Դավիթ Տոնոյանը կապ է հաստատել ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշչիկի հետ։ Նա ներկայացրել է ժամը 03:40-ից ՀՀ պետական սահմանին ստեղծված իրավիճակը, նշել, որ ադրբեջանական կողմն ունի բազմաթիվ վիրավորներ և զոհեր։