ԵՐԵՎԱՆ, 5 հուլիսի - Sputnik. Պետական տոն հռչակված Սահմանադրության օրվա առիթով այսօր Facebook-ի իր պաշտոնական էջում շնորհավորական ուղերձ է հղել ՀՀ փոխվարչապետ, արտակարգ դրության պարետ Տիգրան Ավինյանը։
«Սահմանադրությունն առաջին հերթին պետության ու քաղաքացու միջև կնքված քաղաքացիական պայմանագիր է, որով քաղաքացու կողմից դրվում են պետության գործունեության հիմքերը։ Սահմանադրությամբ է քաղաքացին որոշում, թե որոնք են օրենքի սահմանները, որտեղ է սկսվում և ավարտվում պետական ինստիտուտի լիազորությունը, որոնք են հիմնական նպատակները, որոնց պիտի ձգտի պետություն»,- գրել է փոխվարչապետ Ավինյանը։
Նա շեշտել է՝ ՀՀ քաղաքացին սահմանել է, որ ուզում է տեսնել ինքնիշխան, իրավական, սոցիալական ու ժողովրդավարական պետություն, որտեղ մարդը բարձրագույն արժեք է։ Նրա խոսքով՝ հենց հանուն այս նպատակների իրականացման էլ ՀՀ քաղաքացուն ծառայում են ներկա իշխանությունները։
Նախ պետական շահեր, նոր միայն անձնական. Արմեն Սարգսյանը շնորհավորել է Սահմանադրության օրը
Պարետ Տիգրան Ավինյանը նաև հիշեցրել է, որ համավարակի այս օրերին ավելի, քան երբևէ` բարձր գիտակցություն ու համերաշխություն դրսևորելու կարիք կա՝ հանուն պետության ու մարդու կյանքի իրավունքի։
Ավելի վաղ տոնական օրվա առիթով շնորհավորական ուղերձներ են հղել ՀՀ նախագահ Արմեն Սարգսյանն ու վարչապետ Նիկոլ Փաշինյանը։
Հիշեցնենք՝ ՀՀ Սահմանադրությունն ընդունվել է 1995 թվականի հուլիսի 5-ին համաժողովրդական հանրաքվեով։ Սահմանադրության ընդունումից հետո հուլիսի 5-ը դարձավ պետական տոն՝ Սահմանադրության օր։
Սահմանադրության առաջին փոփոխություններն արվել են 2005 թվականին՝ ՀՀ երկրորդ նախագահ Ռոբերտ Քոչարյանի օրոք։ Փոփոխության անհրաժեշտությունն ի հայտ եկավ այն ժամանակ, երբ 2001 թվականին Հայաստանը Եվրոպայի խորհուրդ մտավ։
Եթե 2005 թվականին տեղի ունեցածը կարելի է սահմանադրական փոփոխություններ անվանել, ապա 2015 թվականի դեկտեմբերի 6-ին` ՀՀ երրորդ նախագահ Սերժ Սարգսյանի օրոք, Հայաստանն արդեն փաստացի նոր փաստաթուղթ ընդունեց։ 2015 թվականի Սահմանադրության ընդունումը նշանակում էր, որ երկիրը կիսանախագահական կառավարման ձևից անցնում է խորհրդարանականի։
Սարգսյանի ստորագրել-չստորագրելն օրենքի համար գրեթե նշանակություն չունի. սահմանադրագետ
Իսկ այս տարի առաջին անգամ սահմանադրական փոփոխություններն արվեցին ոչ թե հանրաքվեի միջոցով (այն պաշտոնապես չեղարկվեց կորոնավիրուսի ու արտակարգ դրության պատճառով), այլ Ազգային ժողովի քվեարկությամբ։