ԵՐԵՎԱՆ, 24 հունիսի – Sputnik. Հիվանդանոցից ողջ դուրս գրված հիվանդի հիվանդության պատմության մեջ նշված «մահ» բառը վրիպակ է՝ պայմանավորված վերակենդանացման բաժանմունքի գերծանրաբեռնվածությամբ: Նման պարզաբանում են ներկայացրել Երևանի «Էրեբունի» ԲԿ–ից։
Կորոնավիրուսը շարունակում է տարածվել խորհրդարանում. Քրիստինե Պողոսյանն էլ է վարակվել
Նշենք, որ երեկ Facebook-ում մի տեսանյութ էր տարածվել որտեղ Ռաֆայել անունով տղամարդը ներկայանում էր որպես Նորիկ Արտաշի Ղարիբյանի թոռնիկ։ Նա նշել էր, որ հունիսի 21–ի առավոտյան պապին տարել են «Էրեբունի» ԲԿ, նա այնտեղ հետազոտություններ է անցել, հարազատներին ասել են, որ խնդիրն այն է, որ աորտայի բացվածքի պատճառով արյունը լցվում է փորի մեջ, առողջանալու հույս չկա։ Իրենք որոշել են պապին տանել տուն և հաջորդ օրը նրան դուրս են գրել հիվանդանոցից, սակայն ամբողջ խնդիրը նրանում է, որ հիվանդանոցից տրված եզրակացության մեջ նշված է, որ կորոնավիրուսի թեստի պատասխանը դրական է, իսկ հիվանդը մահացել է։
«Ինչ վերաբերում է #COVID-19 թեստին, նշենք, որ «Էրեբունի» ԲԿ հոսպիտալացվող յուրաքանչյուր հիվանդից կատարվում է նմուշառում, որն ուղարկվում է ՀՀ ԱՆ ՀՎԿԱԿ լաբորատորիա: Թեստի պատասխանը ստացվել է մեկ օր հետո՝ դրական: Այսինքն, հիվանդանոց մուտք գործելուց հիվանդն արդեն իսկ ունեցել է նոր կորոնավիրուսային վարակ»,–ասվում է ԲԿ–ի պարզաբանման մեջ:
Ո՞ր գլխացավն է վտանգավոր․ բժիշկ Մյասնիկովի պարզաբանումները
ԲԿ–ից նշում են, որ հիվանդը վերակենդանացման բաժանմունք է ընդունվել աորտայի շերտազատվող անևրիզմայով: Վերակենդանացման բաժանմունքում նրա վիճակը կայունացվել է, հրավիրվել է անոթային վիրաբույժ:
Որոշվել է չգնալ վիրահատության, քանի որ վիրահատական միջամտությունը կարող էր հիվանդի կյանքի հետ անհամատեղելի դառնալ:
Հիվանդի հարազատները հրաժարվել են հետագա բուժումից, և հիվանդը դուրս է գրվել:
Հիշեցնենք` այսօրվա տվյալներով Հայաստանում կորոնավիրուով վարակվածների թիվը 21 717 է։
Այս պահին փաստացի բուժում է ստանում 10404 մարդ, կատարվել է 100 400 թեստավորում, առողջացել են վարակվածներից 10797-ը։ Գրանցվել է մահվան 386 (+14) դեպք։ Այլ պատճառներով մահվան դեպքերի ընդհանուր թիվը 130 է (+4)։
Մեկ օրում գրանցվել է կորոնավիրուսից մահվան 14 դեպք. նրանցից 7–ը տղամարդ են, 7–ը` կին