ԵՐԵՎԱՆ, 21 հունիսի - Sputnik. Այս տարի Բուժաշխատողի մասնագիտական տոնը նշվում է դժվարին իրավիճակում, երբ աշխարհը պայքարում է կորոնավիրուսի համավարակի դեմ։ ՀՀ վարչապետ Նիկոլ Փաշինյանը շնորհավորել է բուժաշխատողներին տոնի առիթով՝ ընդգծելով, որ առանց չափազանցության՝ նրանք կորոնավիրուսի դեմ պայքարի մեր հերոսներն են։
«Ինչպես մեր զինվորներն են անձնվիրաբար պաշտպանում հայրենիքի սահմանները, այնպես էլ դուք այս օրերին անմնացորդ նվիրումով պայքարում եք համաճարակի դեմ և փրկում մարդկային կյանքեր։ Բժշկի մասնագիտությունը կոչում է, նվիրվածություն, պատիվ ու պատասխանատվություն, և այս ծանր օրերին ձեր անձնուրացությամբ, զօրուգիշեր անտրտունջ աշխատանքով դուք հավատարիմ եք այդ բարձր առաքելությանը»,- իր շնորհավորական ուղերձում նշել է վարչապետն Փաշինյանն ու հանրապետության բոլոր քաղաքացիների անունից շնորհակալություն հայտնել նրանց այս պայքարի առաջամարտիկի աշխատանքը պատվով կատարելու համար:
Վարչապետն ընդգծել է, որ ՀՀ կառավարությունը որևէ միջոց չի խնայում և չի խնայի առողջապահական համակարգի կարողություններն ավելացնելու ու հզորացնելու, բուժաշխատողների համար անհրաժեշտ աշխատանքային բոլոր պայմաններն ու հնարավորությունները ստեղծելու համար:
Օգտվելով առիթից՝ վարչապետը դիմել է ՀՀ քաղաքացիներին։ Նա շեշտել է, որ այսօր մեր առողջապահական համակարգը հրաշքներ է գործում, և բոլորս պետք է աջակցենք նրան մեր անհատական վարքագծով, հակահամաճարակային կանոնները պահպանելու մեր կարգապահությամբ:
«Բազմիցս եմ ասել և շարունակում եմ կրկնել՝ անհատական ջանքը մեր պետականության զարգացման, մեր ժողովրդի հզորացման, մեր բոլոր խնդիրների լուծման բանաձևն է, և հենց այս գիտակցումով կատարվող արդյունավետ աշխատանքով կկարողանանք միասին հաղթահարել թե՛ համաճարակային ճգնաժամը, թե՛ մեր առջև ծառացած մյուս մարտահրավերները: Յուրաքանչյուրիս պատասխանատու վարքագծով կարող ենք թեթևացնել մեր բժիշկների ծանրաբեռնվածությունը և հնարավորություն տալ նրանց վերադառնալ իրենց ընտանիքներ»,- ասել է վարչապետ Փաշինյանն ու բուժաշխատողներին և նրանց ընտանիքներին մաղթել քաջառողջություն, համբերություն, անսպառ եռանդ, սեր ու երջանկություն:
Վարչապետը համոզվածություն է հայտնել, որ այս պայքարում հաղթանակելու ենք համատեղ ջանքերի արդյունքում: «Սիրում եմ ձեզ, հպարտանում եմ ձեզնով և խոնարհվում եմ ձեր առաջ»,- եզրափակել է շնորհավորական ուղերձը վարչապետ Փաշինյանը։
Հիշեցնենք՝ վաղ առավոտից Հայաստանի բուժաշխատողները շնորհավորանքներ են ստանում։ Մասնագիտական տոնի առիթով արդեն շնորհավորական ուղերձներ են հղել ՀՀ նախագահ Արմեն Սարգսյանն ու առողջապահության նախարար Արսեն Թորոսյանը։