ԵՐԵՎԱՆ, 18 հունիսի - Sputnik. Պետական կենսաթոշակների մասին օրենքում կառավարության առաջարկած փոփոխությունների նախագիծն այսօր ԱԺ-ում մեծ ոգևորությամբ չընդունվեց: Կես տարի հետո կենսաթոշակների էլեկտրոնային վճարման անցնելու գաղափարը պատգամավորներից ոմանք անիրագործելի համարեցին:
«Լուսավոր Հայաստան» խմբակցության պատգամավոր Սրբուհի Գրիգորյանը կարծիք հայտնեց, որ էլեկտրոնային վճարման անցնելու կառավարության առաջարկն անիրագործելի է անգամ բիզնեսի նպատակահարմարության տեսակետից: Նրա խոսքով՝ ոչ մի բանկ իր բանկոմատը չի տեղադրի հինգ կամ տասը թոշակառու ունեցող գյուղում: Մյուս կողմից՝ թոշակառուների համար էլեկտրոնային կենսաթոշակն ու էլեկտրոնային առևտուրն անընկալելի երևույթներ են:
«Այս նախագծով մենք 70 տարեկան տատիկ-պապիկներին ասում ենք՝ QR կոդով ձեր գյուղի բուդկայից կարող ես գնումներ անել՝ որպես այլընտրանք: Իսկ հարցրե՞լ ենք, թե մեր կենսաթոշակառուներից քանիսը սմարթֆոն ունի: 35 000 դրամ կենսաթոշակով մենք ստիպում ենք, որ տատիկը կամ պապիկը գնան ու վարկով սմարթֆոն գնեն»,- ասաց նա:
Ընդդիմադիր պատգամավորը համոզմունք հայտնեց, որ առաջարկվող նախագիծը ոչ միայն չի լուծելու կենսաթոշակառուների խնդկրները, այլ ավելի է ավելացնելու դրանք:
«Իմ քայլը» խմբակցության պատգամավոր Բաբկեն Թունյանը ևս կարծիք հայտնեց, որ կարիք կա հասկանալու, թե որքանով են ՀՀ թոշակառուները պատրաստ օգտվելու իրենց ընձեռվող հնարավորությունից:
Այսուհետ կենսաթոշակներն ու նպաստները կառաքվեն բացառապես փոստատարների միջոցով
«Մինչև օրենքի ուժի մեջ մտնելը մենք դեռ ժամանակ ունենք մի անգամ էլ բոլոր ռիսկերը գնահատելու ու անհրաժեշտության դեպքում՝ ճշգրտելու»,- նշեց Թունյանը:
«Լուսավոր Հայաստան» խմբակցության պատգամավոր Մանե Թանդիլյանն էլ շեշտեց, որ եթե անգամ մարդիկ պատրաստ լինեն տեխնիկական նորամուծություններին, Հայաստանի ենթակառուցվածքները դրանց առայժմ պատրաստ չեն:
«Մինչև 90 բնակիչ ունեցող բնակավայրեր ունենք՝ Ջիլիզա, Յաղդան: Յաղդանը մի չնաշխարիկ վայր է, որտեղ հիմնականում կենսաթոշակառուներ են ապրում, ի՞նչ եք կարծում, քանի բանկոմատ կա այնտեղ: Կարծում եմ՝ պատասխանը ձեզ հայտնի է: Իսկ գիտե՞ք այնտեղից վերջին անգամ երբ է տրանսպորտ գնացել մոտակա բնակավայր, որտեղ հնարավորություն կա անկանխիկ թոշակ ստանալու»,- հետաքրքրվեց Թանդիլյանը՝ հավելելով, որ նման գյուղերը Հայաստանում բազմաթիվ են, որտեղ ոչ մի տրանսպորտ չի աշխատում:
Աշխատանքի և սոցիալական հարցերի փոխնախարար Սմբատ Սաիյանը հիշեցրեց, որ նախագիծն արդեն առաջին ընթերցմամբ ընդունվել էր, և երկրորդ ընթերցման քննարկման արդյունքում կառավարությունն ու խորհրդարանը հանգել էին այն եզրակացության, որ օրենքի գործողության ժամկետը հարկավոր է 6 ամսով հետաձգել:
«Առաջարկվել է փոստային կապի ազգային օպերատորին հնարավորություն տալ ևս իրականացնել կենսաթոշակների անկանխիկ վճարում՝ համապատասխան հաշվարկային հաշվին փոխանցելու միջոցով»,- հայտնեց Սաիյանը:
Առաջարկվող նոր օրենքը սահմանում է, որ Երևան, Գյումրի և Վանաձոր քաղաքներում թոշակների անկանխիկ վճարումը պետք է իրականացվի 2021 թվականի հունվարի 1-ից, այլ քաղաքներում՝ 2021 թվականի հուլիսի 1-ից, մինչև 1000 և ավելի բնակիչ ունեցող գյուղերում` 2022 թվականի հուլիսի 1-ից, իսկ մինչև 1000 բնակիչ ունեցող գյուղերում՝ 2023 թվականի հուլիսի 1-ից: