ԵՐԵՎԱՆ, 11 հունիսի - Sputnik. ՀՀ տարածքային կառավարման և ենթակառուցվածքների նախարար Սուրեն Պապիկյանն այսօր պարետատան նիստից հետո հրավիրված ճեպազրույցի ժամանակ ասաց, որ հավաքույթները շարունակում են մեր երկրում խնդիր լինել կորոնավիրուսի տարածման համար։
Նրա խոսքով՝ այս իրավիճակում բնակչության մի մասը շարունակում է առաջնորդվել զգացմունքայնությամբ։ Հենց այդպես էլ մասնակցում է հարսանիքներին, ծնունդներին, սգո արարողություններին՝ նպաստելով վարակի տարածմանը։
«Էական չէ` սգո արարողության ժամանակ հանգուցյալը մահացել է կորոնավիրուսից, թե այլ պատճառով։ Այդտեղ գտնվող պոտենցիալ հիվանդ մարդը կարող է դառնալ յուրաքանչյուրիս առողջության համար վտանգավոր, հետագայում էլ այդ վարակի տարածման աղբյուր»,- նշեց Պապիկյանը։
Նրա խոսքով` երբ գլուխ է բարձրանում զգացմունքայնությունը, երբ մարդիկ կորցնում են հարազատներին, դժվար է լինում մարդկանց բացատրել խնդրի կարևորությունը, բայց պետք է հետևել պարետի սահմանած կանոններին։
«Յուրաքանչյուրիս գործողությամբ կարող են փրկվել կյանքեր,և յուրաքանչյուրիս անգործությամբ կարող են արձանագրվել մահեր»,- շեշտեց նախարարը։
Նրա խոսքով՝ կյանքը բնականոն շարունակվում է, լինելու են և՛ ծնունդներ, և՛ հարսանյաց արարողություններ, բայց դրանք պետք է անցկացվեն սահմանված կարգին համապատասխան։ Չնայած ռեստորաններում նման արարողությունների անցկացումը գրեթե հնարավոր չէ, բայց Պապիկյանը վստահ է՝ միայն արգելքով չէ, որ պետք է կարողանանք հաղթահարել այս խնդիրը, հանրային բարձր գիտակցություն է պետք։
Հայաստանում կորոնավիրուսով վարակվածների թիվն արդեն հասել է 14669–ի։
ՀՀ վարչապետ Նիկոլ Փաշինյանն այսօր հայտարարեց, որ արտակարգ դրությունը կերկարաձգվի ևս մեկ ամսով։
Հիշեցնենք` մարտի 16–ից Հայաստանում արտակարգ դրություն է։ ՀՀ կառավարությունը մայիսի 14–ի նիստում որոշեց կորոնավիրուսի կանխարգելման նպատակով հայտարարված արտակարգ դրությունը երկարացնել ևս մեկ ամսով։ Այն պետք է ավարտվեր հունիսի 13–ին։
Հունիսի 4-ից արտակարգ դրության ընթացքում կիրառվող կարգավորումներում փոփոխություններ և լրացումներ են ուժի մեջ մտել։ Այսուհետ բոլոր հանրային բաց տարածքներում դիմակ դնելը պարտադիր է։ Հանրային բաց վայրերում դիմակ կարող են չդնել միայն մինչև 6 տարեկան երեխաները, հեծանիվ վարողներն ու ֆիզիկական վարժություններ անողները։