ԵՐԵՎԱՆ, 2 հունիսի - Sputnik. ՌԴ-ից Հայաստան իրականացվող չարտերային չվերթերով հայրենիք վերադառնալու ցանկություն հայտնած քաղաքացիների ներկայացրած դիմում-հայտերի թիվը հունիսի 1-ի դրությամբ գերազանցել է 16 հազար 340-ը։ ՌԴ-ում Հայաստանի դեսպանությունը տեղեկացնում է, որ Facebook -ի էջում հրապարակվել է ավելի քան 4 300 քաղաքացու անուններ, որոնց տվյալները մշակվել ու վերստուգվել են։ Այս գործընթացը շարունակվում է։
«Քաղաքացիների` հայրենիք վերադարձի ապահովումը շարունակում է այս բարդ ժամանակահատվածում մնալ դեսպանության կարևորագույն գործառույթը, որի իրականացման ուղղությամբ մոբիլիզացված է դեսպանության ողջ ներուժը։ Այս է պատճառը նաև, որ որոշ այլ գործառույթներ, մասնավորապես հյուպատոսական որոշ ծառայությունների մատուցման ապահովումը սահմանվածից այլ ժամկետներ է պահանջում»,- նշված է դեսպանության տարածած հաղորդագրության մեջ։
Դեսպանությունը նաև շարունակում է աշխատանքներ իրականացնել նոր չարտերային չվերթեր կազմակերպելու համար։ Առանց հանգստյան օրերի գործում է նաև դեսպանության թեժ գիծը, որն օրական 300-ից ավելի հեռախոսազանգ է սպասարկում։ Դեսպանությունը հայցում է այն դիմողների ներողամտությունը, որոնց զանգերին հնարավոր չի լինում նույն պահին պատասխանել զանգերի մեծ թվի պատճառով։
Այս օրերին բազմաթիվ քաղաքացիներ ՀՀ դիվանագիտական ներկայացուցչություն են դիմում տարաբնույթ խնդիրներով՝ կապված մեկնման անհետաձգելիության, այդ թվում՝ հարազատի կորստի, առողջական խնդիրների, բուժումը Հայաստանում շարունակելու անհրաժեշտության և սոցիալ-տնտեսական բնույթի մի շարք հարցերի հետ։
«Հասկանալով յուրաքանչյուրի իրավիճակն ու առկա խնդիրները՝ այդուհանդերձ, պետք է փաստենք, որ քաղաքացիներին ընդառաջելու հնարավորությունները սահմանափակ են՝ ելնելով երկար ժամանակ չվերթի սպասող և մեծամասամբ նույնանման խնդիրներ ունեցող քաղաքացիների հերթի պահպանման անհրաժեշտությունից»,- հավելում է դեսպանությունը՝ հիշեցնելով, որ չարտերային չվերթերով Հայաստան վերադառնալու առաջնահերթությունը տրվում է ՀՀ քաղաքացիներին։
Սակայն չվերթերից կարող են օգտվել նաև երկքաղաքացի դիմումատուներն ու ՌԴ այն քաղաքացիները, որոնց ընտանիքի անդամ հանդիսացող ՀՀ քաղաքացիները Հայաստանում են։
Դեսպանությունը շեշտում է, որ էլեկտրոնային հարցաթերթիկի միջոցով չվերթի հայտն ընդունված է համարվում այն ամբողջական լրացնելուց ու հայտի ստորին հատվածում նշված «ուղարկել» (submit, отправить) կոճակը սեղմելուց հետո։ Գործընթացն ավարտելուց հետո էկրանին հայտնվում է գրառում այն մասին, որ հայտն ընդունված է։
Հիշեցնենք՝ վերջին ամիսների ընթացքում Ռուսաստանի տարբեր քաղաքներից դեպի Հայաստան, այսպես կոչված, տարհանման հատուկ չվերթեր են իրականացվել, մասնավորապես՝ Մոսկվայից, Սանկտ Պետերբուրգից, Կրասնոդարից, Սոչիից, Վորոնեժից, Դոնի Ռոստովից։ Պարետի նոր որոշմամբ՝ Հայաստան վերադարձող քաղաքացիներն այլևս չեն մեկուսացվի հյուրանոցներում. նրանց ինքնամեկուսացման պահանջ է ներկայացվում։