ԵՐԵՎԱՆ, 24 մայիսի - Sputnik. Վրաստանի ԱԳ նախարար Դավիթ Զալկալիանին հայտարարել է, որ Հայաստանի առողջապահության նախարարությունը դիվանագիտական խողովակներով պաշտոնական Թբիլիսիին է փոխանցել իր ափսոսանքը` կապված գերատեսչության ղեկավար Արսեն Թորոսյանի այն խոսքերի հետ, որոնք կապված էին Վրաստանում COVID-19-ի դեմ պայքարում հակահամաճարակային համակարգի հետ։
Վրաստանում արտակարգ դրությունն ու պարետային ժամը չեն երկարաձգի
Ավելի վաղ Հայաստանի առողջապահության նախարար Թորոսյանը հայտարարել էր, որ Վրաստանում ընդունված և մինչև հիմա COVID-19–ի դեմ պայքարում գործող սահմանափակումներն ավելի արդյունավետ են եղել, քան Հայաստանում, սակայն այդ ամենը վատ հետևանքների է հանգեցրել ՝ սկսած ապրանքների ինքնարժեքի աճից, վերջացրած ազգային արժույթի գնաճով:
Նրա խոսքով՝ Վրաստանում հակահամաճարակային համակարգն ու առողջապահությունը տարբերվում են հայկական համակարգից, ընդ որում ՝ ոչ լավագույն կողմից։ Թորոսյանի խոսքով՝ համաճարակային վիճակագրության վրա կարող էր ազդել մեթոդաբանության, իրականացվող թեստերի քանակի տարբերությունը։
«Հայաստանի առողջապահության նախարարությունից զանգահարել են Երևանում Վրաստանի դեսպանատուն և նախարարի անունից ափսոսանք հայտնել այն կապակցությամբ, որ նրա արտահայտությունները, որոնք, նրանց խոսքով, սխալ են մեկնաբանվել, վշտացրել են վրացի գործընկերներին։ Նրանք ափսոսանք են հայտնել և խնդրել իրենց դիրքորոշումը փոխանցել Թբիլիսիին», - լրագրողներին ասել է Զալկալիանին:
Ըստ Վրաստանի արտաքին քաղաքական գերատեսչության ղեկավարի` այն բանից հետո, երբ ԶԼՄ-ներում տարածվել է Թորոսյանի հայտարարությունը, Վրաստանի դեսպանությունն անմիջապես կապ է հաստատել հայկական կողմի հետ։
«Իհարկե, այդ մեկնաբանությունը կոռեկտ չէր հարևան, բարեկամ երկրի նկատմամբ, առավել ևս, երբ դա արել է առողջապահության նախարարը»,-հավելել է Զալկալիանին:
Հիշեցնենք`Արսեն Թորոսյանը երեկ Հանրային խորհրդի նիստի ընթացքում խոստովանել էր, որ Վրաստանում ընդունված և մինչ օրս գործող սահմանափակումները ավելի արդյունավետ էին, ուժեղ և խիստ։ Սակայն նա կասկած էր հայտնել վարակակիրների հաշվարկի մեթոդաբանության վերաբերյալ, նշելով, որ Հայաստանում հակահամաճարակային համակարգն ավելի լավն է, քան հարևան երկրում։
Սա վրդովմունքի ալիք էր առաջացրել Վրաստանում։ Թբիլիսիից պահանջել էին, որ Թորոսյանը կա՛մ ապացուցի իր ասածները, կա՛մ ներողություն խնդրի։
Թբիլիսիից պահանջում են, որ Թորոսյանը կա՛մ ապացուցի իր ասածները, կա՛մ ներողություն խնդրի