ԵՐԵՎԱՆ, 17 մայիսի –Sputnik. Այսօր Երևանի տարբեր վարչական շրջաններում մի խումբ երիտասարդ էնտուզիաստներ անցորդներին մոտ 12 հազար բժշկական դիմակ են բաժանել։
Երևանում մայիսի 18-ից կսկսի գործել հանրային տրանսպորտը, սակայն երթևեկել կարելի է միայն դիմակներով։ Այս առիթով երիտասարդները որոշել են դիմակներ բաժանել և աջակցել քաղաքացիներին, որոնք գուցե հնարավորություն չունեն դրանք ձեռք բերել։ Միևնույն ժամանակ երիտասարդները որոշել են այդ քայլով ընդգծել կորոնավիրուսի տարածման դեմ պայքարում անվտանգության կանոնների պահպանման կարևորությունը։
Ակցիայի ժամանակ զվարճալի միջադեպ է տեղի ունեցել։ Երիտասարդ ակտիվիստները չեն կարողացել փոցողային երաժիշտներին դիմակ բաժանել։ Սակայն վերջիններիս դա չի վշտացրել, և նրանք որոշել են իրենց նվագով աջակցել այդ փաստից փոքր–ինչ սրտնեղած ակտիվիստներին։
Կորոնավիրուսի հետ կապված իրավիճակի պատճառով Հայաստանում մարտի 16-ից արտակարգ դրության ռեժիմ է սահմանվել, որը երկու անգամ արդեն երկարաձգվել է։ ՀՀ իշխանության վերջին որոշման համաձայն` արտակարգ դրությունը կշարունակվի մինչև հունիսի 13–ը։ Մայիսի 25-ից երկրում «դիմակային ռեժիմ» է սահմանվել։
Նշենք, որ Հայաստանում վերջին մեկ օրվա ընթացքում Covid-19–ի 189 նոր դեպք է գրանցվել։ Կորոնավիրուսով հիվանդ, սակայն այլ հիվանդություններից մահացած մարդկանց թիվը 24 է։ Կորոնավիրուսից մահացել է 60 մարդ։ Նոր տվյալների համաձայն՝ 1925 մարդ բուժվել է։ Բուժման մեջ են գտնվում 2463–ը։ Երկրում ընդհանուր առմամբ 40230 թեստ է անցկացվել։