ԵՐԵՎԱՆ, 16 մայիսի – Sputnik. Մայիսի 18-ից Երևանի կենդանաբանական այգին կվերսկսի իր աշխատանքը, բայց այգու տարածք հնարավոր կլինի մտնել բացառապես անհատական պաշտպանության միջոցներով՝ դիմակով և ձեռնոցներով։
Կենդանաբանական այգուց հայտնում են, որ մուտքի մոտ առկա կլինեն բավարար թվով ալկոհոլային հիմքով ձեռքերի ախտահանիչներ: Մուտք գործող անձանց ջերմաչափում կիրականացվի:
Սահմանափակումներ կգործեն նաև այգու ներսում։ Մասնավորապես՝ կարգելվի կենդանիներին կերակրելը, վանդակների երկաթյա մակերեսներին ձեռք տալը, իսկ այցելուների միջև սոցիալական հեռավորության պահպանումը կվերահսկեն այգու պատասխանատու աշխատակիցները:
Քանի որ այցելուների քանակը սահմանափակվելու է, այցելուներին հորդորում են նախապես գրանցվել ու մուտքի տոմսեր ամրագրել՝ զանգահարելով 010 56 2362 կամ 010562165 հեռախոսահամարներով։
Երևանի կենդանաբանական այգին կգործի ամեն օր՝ ժամը 11։00-ից 19։00-ը։
Այգու ամբողջ տարածքում օրը 2 անգամ կիրականացվեն ախտահանման աշխատանքներ։
Հիշեցնենք` ՀՀ կառավարությունը մայիսի 14–ի իր նիստում որոշեց արտակարգ դրությունը երկարացնել ևս մեկ ամսով։ Այն կտևի մինչև հունիսի 13–ը, ժամը 17։00–ը ներառյալ։ Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։