ԵՐԵՎԱՆ, 15 մայիսի – Sputnik. Եթե մի օր Թուրքիան պաշտոնապես ճանաչի Հայոց ցեղասպանությունն, ապա դա առաջին հերթին լավ կլինի Թուրքիայի ժողովրդի և Թուրքիայի համար։ Նման կարծիք է հայտնել Հայաստանի նախագահ Արմեն Սարգսյանը` տեսակապի միջոցով հնդկական StratNews Global հեղինակավոր տեղեկատվական պորտալին տված հարցազրույցի ժամանակ անդրադառնալով Հայող ցեղասպանության հարցում Թուրքիայի վարած ժխտողական քաղաքականությանը։
«Ցեղասպանության ժխտման խնդիրը գալիս է նրանից, որ այն չի ճանաչվել Թուրքիայի կողմից: Մի քանի կետ կառանձնացնեմ, որից առաջինը կանվանեմ ուժ: Եթե դուք ընդունում եք ձեր սխալներն, ապա ուժեղ եք, կարողանում եք ասել՝ այո՛, սխալ քայլ եմ արել և ցավում եմ դրա համար: Այդ քայլը ձեզ թույլ չի դարձնում, այլ ուժեղացնում է: Երկրորդ կետը կանվանեմ ճշմարտություն և արդարություն»,–ասել է նախագահը։
Սարգսյանն ասել է, որ 1,5 միլիոն մարդ նահատակվեց նախկին Օսմանյան կայսրության տարածքում: Այդ մարդիկ այնտեղ էին ապրում հազարավոր տարիներ. հայերը նորեկներ չէին, իսկ ո՞ւր մնաց նրանց մշակույթը, հազարավոր եկեղեցիները, ամրոցները, մշակութային կենտրոնները, մեծ գրականությունը և այլն:
«Կա պատմություն, և աշխարհն այն ճանաչել է»,–ասել է ՀՀ նախագահը:
Նա նշել է նաև, որ Թուրքիան ցանկանում է միանալ Եվրոպական միությանը, սակայն եվրոպական ամենամեծ արժեքներից մեկը հանդուրժողականությունն է, որը Եվրոպան միասնական է պահում: Ըստ նրա` կարևոր է ճանաչել պատմությունը և հանդուրժողականության ճանապարհով գնալ:
ՀՀ նախագահն ասել է նաև, որ 1915 թվականին մենք կորցրինք 1,5 միլիոն մարդ: Պարզ մաթեմատիկական հաշվարկով՝ եթե դա չլիներ` ամբողջ աշխարհի հայերը, որոնք այսօր մոտ 10 միլիոն են (որից 3 միլիոնն է Հայաստանում ապրում), կլինեին 20-25 միլիոն: Սա, ըստ Սարգսյանի, միայն 1,5 միլիոն հայերի մահվան մասին չէ, այլ սերունդների կորուստ է։
Թուրքիան մենակ է մնում ժխտման մեջ. ֆրանսիական պարբերականը Սարգսյանի հոդվածն է հրապարակել
«Մենք նաև դարեր ի վեր տարբեր մշակույթների, տեղեկատվության կրողներ, վաճառականներ ենք եղել: Հայերը մշտապես կապված են եղել տարբեր մշակույթների հետ: Հայերը քաղաքակրթության խաչմերուկում են եղել, մենք առաջին քրիստոնյա երկիրն ենք աշխարհում, մենք շատ ենք տառապել, ինչը, կարծում եմ, մեզ ուժեղ, վերապրող ժողովուրդ է դարձրել: 21-րդ դարում անհատական վերապրողները դեռ շարունակում են շատ կարևոր լինել»,–ասել է Սարգսյանը:
Հիշեցնենք, որ ապրիլի 25–ին ֆրանսիական հեղինակավոր «Le Monde» պարբերականը հրապարակել էր Հայաստանի նախագահ Արմեն Սարգսյանի` «Անցյալի փորձությունների վերաբերյալ հիշողությունը հիմնարար նշանակություն ունի» հոդվածը։
Սարգսյանն իր հոդվածում կրկին անդրադարձել էր Հայոց ցեղասպանության թեմային։
Հայաստանի նախագահը պատմել է՝ ինչպես էր նախկինում տոնում Հաղթանակի օրը. տեսանյութ