Արամ Սարգսյանը կարծում է, որ Հայաստանում փորձում են զարգացնել այլասերությունը` հնարավորություն տալով ԼԳԲՏ համայնքին իրականացնել ագրեսիվ քարոզչություն, ուստի ՀԴԿ–ն կոչ է անում հանրությանը քաղաքակիրթ ճանապարհով բողոքարկել կոնվենցիան։
«Կոնվենցիան պարունակում է շատ լուրջ վտանգներ։ Արդեն որպես եզրույթ են մտցնում «սեռական կողմնորոշում» հասկացությունը, այն էլ 6 տարեկան երեխայից սկսած, որովհետև խոսքը վերաբերում է դպրոցներում սեռական դաստիարակության առնչությամբ համապատասխան դասընթացներ կազմակերպելու մասին, ինչը մեզ համար, մեր ընտանիքների համար անընդունելի է»,– նշում է ՀԴԿ նախագահը։
Սարգսյանի համոզմամբ` սա նշանակում է պղծել երեխաների հոգիները, քանի որ նրանք պատրաստ չեն այդ ամենին, և դրա կարիքն էլ չկա։ Ըստ նրա` երեխաների ճիշտ դաստիարակությունը մեր ընտանիքներում միշտ եղել է կարևորագույն հարց, անվտանգության խնդիր, մինչդեռ հիմա այդ ամենի տեղափոխումը ինչ–որ անհասկանալի մի միջավայր, որը նաև ընդգրկելու է ԼԳԲՏ համայնքի ներկայացուցիչներին, նրանց իրավունք է տրվելու դասընթացներ անցկացնել իրենց ունեցած ծրագրերով, ուղղակի վտանգ է պարունակում աճող սերնդի դաստիարակության հարցում։
«Այն բացատրությունները, որ տալիս են իշխող «Իմ քայլը» խմբակցության պատգամավորները, ուղղակի անընդունելի են, անհեթեթություն են։ Նրանք ենթարկվում են Եվրախորհրդին, որն էլ պահանջներ է ներկայացնում իր կոնվենցիայով։ Բացի դրանից, կոնվենցիան պարունակում է հավելված, որտեղ նշված են այսպես կոչված եվրոպական ստանդարտները։ Մեր կարծիքով` նման դաստիարակության վերաբերյալ առանձին դասընթացներ պետք է լինեն միայն բարձր դասարանցիների համար և այն էլ համաձայնեցված լինեն ծնողների հետ, որովհետև նրանք ենք առաջին հերթին դաստիարակում երեխաներին ու ապահովում նրանց անվտանգությունը»,– ասում է Դեմկուսի նախագահը։
Սարգսյանը նշում է, որ իրենք անիմաստ են համարում հարցը քննարկել կոնվենցիան վավերացրած պատգամավորների հետ, ուստի կոչ են անում ծնողներին, տատիկ–պապիկներն դիմում–բողոքներ ներկայացնել կառավարության փոստարկղ` ներկայացնելով իրենց քաղաքացիական դիրքորոշումը։
Կուսակցությունը համարում է, որ մեր սերունդը պետք է առողջ մեծանա և հեռու լինի արատավոր երևույթներից, հետևաբար հորդորում է քաղաքացիներին պայքարել երեխաների իրական իրավունքների համար։
Երեխաները կսովորեն անկաշկանդ օգնություն խնդրել․ պատգամավորը՝ Լանզարոտեի կոնվենցիայի մասին
Հիշեցնենք`հակառակ հասարակության շրջանում առկա դժգոհություններին` ԱԺ-ն մայիսի 11-ին ընդունեց դեռևս 10 տարի առաջ ՀՀ այն ժամանակվա իշխանության ստորագրած ու մինչ օրս չվավերացված «Սեռական շահագործումից և սեռական բնույթի բռնություններից երեխաների պաշտպանության մասին» եվրոպական կոնվենցիան:
Կոնվենցիայի նախագծին կողմ քվեարկեց նիստին ներկա 84 պատգամավորներից 79-ը: Նախագիծն ընդունվեց:
«Սեռական շահագործումից և սեռական բնույթի բռնություններից երեխաների պաշտպանության մասին» Եվրոպայի խորհրդի կոնվենցիան ստորագրվել է 2007թ. հոկտեմբերի 25-ին: