ԵՐԵՎԱՆ, 12 մայիսի – Sputnik. Կորոնավիրուսային վարակը կարող է խոցել կանացի վերարտադրողական օրգանները և հանգեցնել անպտղության։ Նման բան են պարզել Ցզինինի բժշկական համալսարանի (Jining Medical University) ֆիզիոլոգիայի դեպարտամենտի չինացի գիտնականները։
Մասնագետների կարծիքով` այս հիպոթեզի հաստատման և ավելի հստակ եզրակացություններ անելու համար անհրաժեշտ է ուսումնասիրել կորոնավիրուսով վարակված և առողջացած կանանց, ինչպես նաև հղիների առողջական վիճակը։
Ցզինինի բժշկական համալսարանի գիտնականները հոդված են հրապարակել, որում տվյալներ են ներկայացվել կանանց վերարտադրողական համակարգի վրա COVID-19–ի հավանական ազդեցության մասին։
Նրանք կարծում են, որ պաթոգենը կարող է ներթափանցել միզասեռական համակարգի օրգաններ, քանի որ դրանց բջիջների վրա մեծ քանակությամբ ACE2 ռեցեպտորներ կան, իսկ ինչպես հայտնի է, դրանք կորոնավիրուսի համար մուտքի դարպաս են հանդիսանում։ Վարակը դրանց միջոցով կարող է հանգիստ ներթափանցել օրգանիզմի բջիջների մեջ։
COVID-19. աշխարհում բացահայտված դեպքերի թիվն արդեն 4.2 միլիոնից ավել է. նոր տվյալներ
Ինչպես նշվում է հոդվածում, գիտության մեջ մեծաթիվ տվյալներ են ներկայացված այդ սպիտակուցի առկայության մասին ոչ միայն թոքերում, այլև երիկամներում, լյարդում, կենտրոնական նյարդային համակարգում։ Սակայն կանանց սեռական համակարգի վերաբերյալ տվյալները դեռ չափազանց քիչ են։
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ: Կազմակերպությունը բոլոր պետություններին կոչ է արել միավորվել վարակի դեմ պայքարում։
Գիտնականները կորոնավիրուսի փոխանցման նոր եղանակ են հայտնաբերել