ԵՐԵՎԱՆ, 7 մայիսի – Sputnik. ՀՀ շրջակա միջավայրի նախկին նախարար Էրիկ Գրիգորյանը հաստատեց, որ պաշտոնից ազատվել է սեփական դիմումի համաձայն։ Նա գրառում է արել Facebook–ի իր էջում։
«Սեփական դիմումի համաձայն ազատվել եմ շրջակա միջավայրի նախարարի պաշտոնից, ցանկանում եմ հանդես գալ վերջին երկու տարիների ընթացքում կատարած աշխատանքի վերաբերյալ հաշվետվությամբ։ Աշխատանքները իրականացվել են նախարարության և ենթակա կառույցների ջանքերով, ինչի համար շնորհակալություն եմ հայտնում մեր թիմին, հպարտ եմ Ձեզնով։ Այո, մեր աշխատանքները այս համատարած սենսացիոն և լայքաբեր տեղեկատվական հոսքերում տեղ չգտան և հնչեղություն չստացան, միգուցե շատ զբաղված էինք համակարգ կառուցելով, քան աղմուկ հանելով»,– գրել է նա։
Գրիգորյանի խոսքով` նախարարության ողջ անձնակազմը, չնայած հնչող քննադատություններին ու հաճախ անարդար վերաբերմունքին, արել է առավելագույնը՝ տասնամյակներով ժառանգած խնդիրները լուծելու համար։
«Չի կարող կառուցվել և հզորանալ որևէ պետություն, եթե չհարգվի պետական ծառայողի աշխատանքը՝ առաջին կարգի մասնագետից մինչև վարչապետ և նախագահ։Մեր բոլոր գործողություններում մեզ առաջնորդել է միայն և միայն պետական շահը և Հայաստանի Հանրապետության քաղաքացու առողջ շրջակա միջավայր ունենալու իրավունքի ապահովումը։ Շնորհակալություն եմ ուզում հայտնել վարչապետ Նիկոլ Փաշինյանին և կառավարության իմ գործընկերներին՝ համագործակցության ու միասնական ջանքերի համար։ Ի վերջո, շրջակա միջավայրի պահպանությունը յուրաքանչյուրիս գործն է՝ անկախ մասնագիտությունից, աշխատավայրից և նախասիրություններից»,– նշել է նախկին նախարարը։
Հիշեցնենք` մայիսի 6-ին լուրեր տարածվեցին, որ Էրիկ Գրիգորյանը հրաժարվել է պաշտոնից։ Sputnik Արմենիայի աղբյուրը հաստատեց տեղեկությունը։ Ավելի ուշ ՀՀ նախագահի մամուլի ծառայությունը հայտնեց, որ հիմք ընդունելով վարչապետի առաջարկությունը՝ Արմեն Սարգսյանն Էրիկ Գրիգորյանին ազատել է շրջակա միջավայրի նախարարի պաշտոնից։
Փաշինյանը մեկնաբանեց, թե ինչու է հրաժարական տվել Էրիկ Գրիգորյանը