ԵՐԵՎԱՆ, 7 մայիսի – Sputnik. Ամերիկյան լրատվամիջոցները հայտնում են, որ սպանվել է գիտնական Բինգ Լյուն, որը COVID-19 առաջացնող SARS-CoV-2 կորոնավիրուսային վարակի վերաբերյալ շատ կարևոր բացահայտումների շեմին էր։
CNN-ը հայտնում է, որ Պիտսբուրգի համալսարանի բժշկության դպրոցում աշխատող 37–ամյա Լյուին մայիսի 2-ին հայտնաբերել են Փենսիլվանիա նահանգում գտնվող իր տանը։ Գիտնականի գլխի ու պարանոցի հատվածում հրազենային վնասվածքներ են եղել։ Մարդասպանի դին էլ հայտնաբերել են մեքենայում` գիտնականի տնից մոտ մեկ կիլոմետր հեռավորության վրա։
Սպանվածի գործընկերները ԶԼՄ–ներին հայտնել են, որ հանգուցյալը SARS-CoV-2 կորոնավիրուսի պատճառներն ու բարդացումների բջջային հիմքը բացատրող կարևոր բացահայտումների շեմին էր։
Աշխարհում կորոնավիրուսով վարակվածների թիվը հատել է 3 մլն 820 հազարի սահմանը
Ոստիկանության ներկայացուցիչն էլ տեղեկացրել է, որ տղամարդիկ ծանոթ են եղել, սակայն չկան ապացույցներ, որ Բինգ Լյուն իր ազգության պատճառով է սպանվել (նա չինացի է)։
Ոստիկանությունը հաղորդագրություն է հրապարկել Facebook-ում` նշելով, որ տեղի ունեցածը ինտիմ զուգընկերոջ վերաբերյալ երկարատև վիճաբանության հետևանք է։ Հետաքննության մասնակիցները վստահ են, որ տեղի ունեցածը կապված չէ համալսարանի աշխատանքի կամ կորոնավիրուսի համավարակի հետ։
Պիտսբուրգի համալսարանի հաղորդագրության մեջ նշված է, որ Բինգ Լյուն ականավոր գիտնական էր։