ԵՐԵՎԱՆ, 6 մայիսի – Sputnik. ՀՀ վարչապետ Նիկոլ Փաշինյանն այսօր ԱԺ-ում, պատգամավորների հարցերին ի պատասխան, անդրադարձավ ԱԱԾ տնօրենի տեղակալի պաշտոնում Արգիշտի Քյարամյանի նշանակման թեմային:
«Չեմ հիշում` Լենինն էր ասել, թե Ստալինը. «Кадры решают все»: Մենք պետք է իրապես ընդունենք ու խոստովանենք, որ մեր իրավապահ համակարգը շոկի մեջ է իրականում: Եվ ես դա զգում եմ տարբեր առիթներով»,- ասաց նա:
Որպես օրինակ վարչապետը նշեց, որ Ոստիկանության ու ԱԱԾ-ի աչքի առաջ տեղի է ունեցել մի բան, որը երկար տարիներ նրանց ներշնչվել է, թե հնարավոր չէ: Խոսքը, ըստ նրա, 2018թ-ի հեղափոխության մասին է:
Այս շոկը, Փաշինյանի խոսքով, մինչ օրս էլ հաղթահարված չէ և այդ համակարգերի ամենամեծ պրոբլեմն է: Նոր իրավիճակում, վարչապետի բնորոշմամբ, իրավապահ մարմինները պետք է գիտակցեն, որ իրենց ուսերին նոր, ավելի բարձր առաքելություն է դրված:
Ինչ վերաբերում է Քյարամյանի նշանակմանը, Փաշինյանը նշեց, որ այն անգամ հումորի առիթ էր դարձել այն իմաստով, որ Քյարամյանը երկու օրում երկու պաշտոնի է նշանակվել:
«Ես կայացրել եմ քաղաքական որոշում, որ նա պետք է այնտեղ աշխատի, դա աշխատանքային անհրաժեշտություն եմ համարել: Պարզապես օրենքն այդ միջանցքն է տվել, որպեսզի նա հայտնվի ԱԱԾ-ում: Ուզում եմ անկեղծ ասել, որ իմ քաղաքականությունը եղել է այն, որ ոստիկանությունում ու ԱԱԾ-ում որոշ ժամանակ դրսից նշանակումներ չեն արվել՝ խոստման համաձայն: Հիմա եկել է արված աշխատանքի արդյունավետությունը գնահատելու, վերագնահատելու ժամանակը և ազդարարելու մի փուլի մեկնարկ, որտեղ կարող են լինել դրսից նշանակումներ»,- ասաց Փաշինյանը:
Վարչապետը հուսով է, որ պետական համակարգերը կգնահատեն իր այդ վերաբերմունքը, ոչ թե «ոմանք կառիթավորվեն»:
«Մեր խնդիրն է եղել, որ Հայաստանի զարգացմանը ներգրավվի մեր ազգային ներուժի հնարավորինս մեծ մասը: Ես ուրախ եմ, որ մենք այսքան ռեսուրս, կամք ենք ունեցել մարդկանց շանս տալու համար: Ով օգտվել է, օգտվել է, ով չի օգտվել, իր պրոբլեմն է: Մեր Սարյան փողոցի շենքերից մեկի վրա Աննա Ախմատովայի հայտնի արտահայտությունն է գրված. «Ինչ տվեցիր, քոնն է»: Այն, ինչ մենք տվել ենք, մերն է, որևէ մեկը չի կարող մտածել, թե մեզանից բան է գողացել: Ինչ որ մենք տվել ենք, մերն է, մեր պատմությունն է, մեր արժանապատվությունն է ու մեր սկզբունքայնությունը։ Մենք չենք ասել՝ մտնենք իրավապահ համակարգ, բոլորին թացը չորին խառնած հանենք դուրս ու բերենք մեր կուսակիցներին կլցնենք: Այո, մենք այդ շանսը տվել ենք, ու այն, ինչ տվել ենք, մերն է»,-ասաց Փաշինյանը:
Հիշեցնենք` ՀՀ նախագահ Արմեն Սարգսյանը, հիմք ընդունելով վարչապետ Նիկոլ Փաշինյանի առաջարկությունը, երեկ ՀՀ ազգային անվտանգության ծառայության տնօրենի տեղակալ է նշանակել Արգիշտի Քյարամյանին։
Ուշագրավ է այն հանգամանքը, որ Քյարամյանը մեկ օրում երկրորդ անգամ է պաշտոն ստացել և ազատվել. նախորդ օրը Փաշինյանի որոշմամբ Քյարամյանը Քննչական կոմիտեի նախագահի տեղակալ էր նշանակվել։ Սակայն մեկ օր պաշտոնավարելով` Քյարամյանն ազատվել է ՔԿ նախագահի տեղակալի պաշտոնից ու ԱԱԾ տնօրենի տեղակալ նշանակվել։
Մինչ այդ Քյարամյանն աշխատում էր պետական վերահսկողական ծառայությունում` զբաղեցնելով ՊՎԾ ղեկավարի տեղակալի պաշտոնը։ Նա այդ պաշտոնին էր նշանակվել 2019 թվականի ապրիլի 10-ից, իսկ ազատվել է մայիսի 4-ին։