ԵՐԵՎԱՆ, 5 մայիսի — Sputnik. Հումանիտար ականազերծման և փորձագիտական կենտրոնը տեղեկացնում է, որ ՀՀ մարդասիրական առաքելություն իրականացնող 4-րդ խմբի սակրավորներն ապրիլին ականազերծել են 5041 քմ ականապատ տարածք և հայտնաբերել 16 հատ ՊՄՆ-2 տեսակի հակահետևակային ականներ:
«Առաքելության առաջին իսկ օրվանից ականազերծվել է ընդհանուր 152 738 քմ տարածք: 4-րդ խմբի բժիշկները, ապրիլին կորոնավիրուսի սահմանափակումներով պայմանավորված, բուժօգնություն են ցուցաբերել թվով 144 տեղաբնակների: Այսպիսով, ՀՀ մարդասիրական խումբը 2019–ի փետրվարից մինչև այսօր ընդհանուր 12 035 հիվանդի է օգնել»,–նշված է հաղորդագրության մեջ։
Այս ժամանակահատվածում Հալեպի բուժհաստատություններին փոխանցվել են բժշկական պարագաներ և մեծ քանակությամբ դեղորայք: ՊՈԱԿ փորձագիտական կենտրոնի ուղարկած մարդասիրական օգնության մի մասը տրվել է Հայ համայնքին պատկանող մանկատանը:
Հալեպում ՀՀ գլխավոր հյուպատոսության հետ համագործակցությամբ ապրիլի 12-ին ՀՀ Հումանիտար առաքելություն իրականացնող խումբը Հալեպի զինվորական հոսպիտալին և այլ բժշկական հաստատություններին փոխանցել է բժշկական պարագաներ։
Հալեպի զինվորական հոսպիտալի պետ, գեներալ Ֆայեզ ալ-Այուբիին բարձր է գնահատել հայ և սիրիացի բժիշկների համատեղ ջանքերը։ Գեներալը նշել է, որ Սիրիայի ժողովուրդը գնահատում է, որ հայերն այս դժվար իրավիճակում իրենց կողքին են։
Միևնույն ժամանակ, ապրիլի 19-ին Սիրիայում հումանիտար առաքելություն իրականացնող խմբի մասնագետները Հալեպի ազգային պատսպարանի ծերանոցին և Հայ համայնքի մանկատանն են փոխանցել «Մի բուռ ժպիտ» խորագիրը կրող ակցիայի ընթացքում հավաքված նվերները:
Հալեպում միայն մարտ ամսին հայ բժիշկներն օգնություն են ցուցաբերել 1169 տեղաբնակի
Հիշեցնենք, որ միայն 2020-ի մարտ ամսվա ընթացքում հայկական հումանիտար առաքելության կողմից Հալեպի նահանգում ականազերծվել է 19 697 քմ ականապատ տարածք: Սիրիայում գտնվող մեր բժիշկները բուժօգնություն են ցուցաբերել 1169 տեղաբնակների։