ԵՐԵՎԱՆ, 5 մայիսի – Sputnik, Լաուրա Սարգսյան. Ավելի քան 250 ռեստորատորներ այսօր հռչակագիր են ստորագրել` առաջարկելով տարեկան վարձավճարի սաhմանման ընդունելի շեմ համարել մինչ այդ գործող վճարի 50%-ը։ Նախաձեռնության հեղինակը Ռեստորանների հայկական միությունն է։
«Առաջարկում ենք գործունեության հարկադիր կասեցման ընթացքում դադարեցնել վարձավճարը»,–նշված է հռչակագրում։
MBG Hospitality–ի PR մենեջեր Աննա Սալոմեն Sputnik Արմենիայի հետ զրույցում հայտնեց, որ հռչակագիրը երկու կարևոր կետ ունի, որից մեկը հենց վարձավճարների նվազեցումն է։
«Այս ընթացքում, երբ ռեստորանները դադարեցրել են իրենց աշխատանքը, մեր տարածքների վարձատուներից ոմանք վճար չեն էլ պահանջել։ Իսկ հիմա պայմանավորվածություն ենք ձեռք բերել, որ մայիսից սկսած` տարածքի վարձակալության համար նախկինում տրվող գումարի կեսը վճարենք»,–ասաց Սալոմեն։
Ի դեպ, Երևանի կենտրոնում տարածքի համար տրվող վարձավճարը մեկ ամսվա համար 3000-6000 դոլար է։
Սալոմեի խոսքով` հռչակագրում ամրագրված կարևոր կետերից է նաև այն, որ ստորագրողները պարտավորվում են հանրային սննդի ոլորտի գործունեության վերականգնումից հետո 18 ամսվա ընթացքում չքննարկել իրենց գործընկերների կողմից զբաղեցրած կամ արդեն իսկ ազատված տարածքների վարձակալության վերաբերյալ վարձատուի որևէ առաջարկ, չբանակցել այդ ուղղությամբ, չկնքել համապատասխան պայմանագրեր և չզբաղեցնել միմյանց կողմից ազատվող վարձակալվող տարածքները։։ Այսինքն` եթե որևէ ռեստորատոր չկարողանա վճարել ամսական վարձը և լքի տարածքը, մեկ ուրիշը չպետք է նոր պայմանագիր կնքի այդ տարածքի համար։ Սա, ըստ նրա, կարևոր է այնքանով, որ խաղի ընդհանուր կանոններ սահմանվեն։
Ռեստորանների միության նախագահ Վահե Գևորգյանն էլ նշեց, որ իրենք հույս ունեն` նախկինում ունեցած շրջանառության 50-60 տոկոսն ունենալ միայն 1 տարի անց։ Նրա խոսքով` նախ զբոսաշրջիկների մեծ հոսք չի սպասվում այս տարի, բացի այդ, ներքին սպառողը շատ գումար չի ունենա ռեստորան այցելելու համար։
«Ինչ վերաբերում է վարձակալության պայմաններին, ապա այս ընթացքում կան վարձակալներ, որոնք նշել են` զիջման չեն գնալու։ Սակայն նման դեպքերում ռեստորանատերը կարող է դատարան դիմել` իրավիճակը արտակարգ ճանաչելու պահանջով։ Երբ պայմանագիր է կնքվում ռեստորանատերերի հետ, այնտեղ նշված են համապատասխան պայմաններ արտակարգ դրության համար»,–ասաց Գևորգյանը։
Նրա խոսքով` իրենք կանեն ամեն ինչ, որ գործը դատարան դիմելուն չհասնի։
Հիշեցնենք, որ Հայաստանում արտակարգ դրություն է հայտարարվել մինչև մայիսի 14–ը։ Չնայած այդ հանգամանքին, արդեն իսկ մայիսի 4-ից տեղաշարժի իրավունքի սահմանափակումը հանվել է։
Ի՞նչ է լինելու Հայաստանի ռեստորաններում ու սուպերմարկետներում արտակարգ դրությունից հետո