ԵՐԵՎԱՆ, 1 մայիսի — Sputnik. ՀՀ վարչապետ Նիկոլ Փաշինյանը տեղեկացնում է, որ կառավարության ընդունած հակաճգնաժամային 1-ից 13-րդ միջոցառումների շրջանակում այս պահի դրությամբ բաշխվել է 57.3 միլիարդ դրամ:
«Գումարը բաշխվել է շուրջ 23 հազար իրավաբանական և 825 հազար ֆիզիկական անձանց միջև»,–Facebook սոցցանցի իր էջում գրել է Փաշինյանը։
Նրա խոսքով` այս թվերը չեն ներառում հակաճգնաժամային 14,15,16 միջոցառումները, որոնց իրագործումը ընթացքի մեջ է: Այս ծրագրերի իրագործման արդյունքում շահառու ֆիզիկական անձանց թիվը կգերազանցի 1 միլիոն 200 հազարը:
Հիշեցնենք, որ Փաշինյանը երեկ հայտարարել էր, որ եթե կառավարությունը մինչ այս աջակցում էր մինչև 10 000 դրամ էլեկտրաէներգիայի սպառում ունեցողներին, սակայն հիմա կաջակցեն նաև նրանց, ովքեր փետրվարին 10 001–25 000 դրամի էլեկտրաէներգիա և 30 001–40 000 դրամի գազ են սպառել։ Այդպիսով` 207 837 էլեկտրաէներգիայի, իսկ 81 697 գազի բաժանորդներ փոխհատուցում կստանան։
Ավելին, 50 տոկոս փոխհատուցում կտրամադրեն նաև մարտին մինչև 3000 դրամի ջուր սպառած բաժանորդներին. 424 972 բաժանորդ կօգտվի այս աջակցությունից։
«Հունվարից հոսանք չունենք». Փաշինյանը զանգեց հոսանքազրկված քաղաքացիներին
Իսկ չգազաֆիկացված 310 գյուղերի բնակիչների փետրվարյան էլեկտրաէներգիայի ծախսը կփոխհատուցվի 50, ընդհուպ մինչև 70 տոկոսով։ Այսպիսով, ըստ Փաշինյանի, կոմունալ ճգնաժամի հարցը փակվում է, քանի որ 4-5 մլրդ դրամ են ծախսում քաղաքացիների կոմունալ վարձավճարների փոխհատուցման համար։