ԵՐԵՎԱՆ, 29 ապրիլի - Sputnik. ՀՀ առողջապահության նախարար Արսեն Թորոսյանն այսօր Sputnik Արմենիայի թղթակցին հայտնեց, որ վերջին օրերին Հայաստանում մահացած երկու անձանց մոտ կորոնավիրուս է հայտնաբերվել դիահերձումից հետո: Ավելի վաղ նրանք բուժում են ստացել այլ հիվանդանոցներում և այլ հիվանդությունների պատճառով։
«Պացիենտները մահացել են այլ հիվանդություններից, իսկ նրանց մոտ կորոնավիրուս է հայտնաբերվել մահվանից հետո` դիահերձման ժամանակ», - ասաց նախարարը:
Ինչ վերաբերում է հիվանդների հետ սերտ շփում ունեցած մարդկանց, ապա, Թորոսյանի խոսքով, նրանց շրջանակը պարզվում է, նախարարությունը զբաղվում է այդ խնդրով:
Ավելի վաղ ՀՀ առողջապահության նախարարի մամուլի խոսնակ Ալինա Նիկողոսյանը հայտնել էր, որ նախորդ օրերին արձանագրվել է մահվան 2 դեպք, երբ պացիենտների մոտ հաստատվել է կորոնավիրուսային վարակ: Նա ևս նշել էր, որ կորոնավիրուսով վարակված երկու պացիենտների մահը վրա է հասել այլ հիվանդությունների պատճառով։
Ապրիլի 29-ի դրությամբ երկրում կորոնավիրուսով վարակվածների թիվը հասել է 1932–ի: 900 մարդ բուժվել է, 30-ը` մահացել: Փաստացի բուժում է ստանում 1000 պացիենտ
Հիշեցնենք, որ կորոնավիրուսի տարածումը կանխելու համար Հայաստանում մարտի 16-ից ապրիլի 14–ն արտակարգ դրություն էր սահմանվել։
Ապրիլի 11–ին կառավարության նիստում ՀՀ փոխվարչապետ, պարետ Տիգրան Ավինյանն առաջարկեց ևս 30 օրով երկարաձգել այդ ռեժիմը։
Ապրիլի 13–ին գործադիր մարմինն արտահերթ նիստում միաձայն ընդունեց հանրապետությունում արտակարգ դրության ռեժիմը 30 օրով երկարաձգելու որոշումը։ Այն կտևի մինչև 2020 թվականի մայիսի 14-ը՝ ժամը 17:00-ը ներառյալ։