ԵՐԵՎԱՆ, 28 ապրիլի - Sputnik. Կորոնավիրուսով պայմանավորված իրավիճակում ՀՀ ՊՆ-ն համապատասխան միջոցներ կձեռնարկի ամառային զորակոչն անվտանգ կազմակերպելու համար:
Մասնավորապես, ինչպես Facebook-ի իր էջում նշել է ՊՆ մամուլի խոսնակ Շուշան Ստեփանյանը, զորակոչիկներին և զորակոչը սպասարկող անձնակազմին կտրվեն անհատական պաշտպանիչ միջոցներ՝ դիմակ, ձեռնոց, ալկոգել:
Անհարկի կուտակումներից խուսափելու համար զորակոչիկները իրենց ԶԶՀԾ տարածքային ստորաբաժանումներ կներկայանան փոքր խմբերով:
Քանի որ միշտ մարդաշատ է հատկապես կենտրոնական հավաքակայանը, զորակոչի ընթացքին ծնողները կհետևեն դրսից` տեսակապի միջոցով: Հնարավորինս կնվազեցվի զորակոչիկների և զորակոչը սպասարկող անձնակազմի միջև շփումը: Վիճակահանության համար կօգտագործվեն բաց տարածքները։
Ստեփանյանը նաև նշում է, որ զորակոչիկները, որոնք կժամանեն հավաքատեղի Երևան քաղաքի մերձակայքում գտնվող բնակավայրերից, գիշերը չեն անցկացնի այդտեղ, վիճակահանությունից անմիջապես հետո նրանք կուղևորվեն զորամասեր: Բարձր ջերմություն ունեցող զորակոչիկները կմեկուսացվեն:
Զինվորական ստորաբաժանումներում նորակոչիկները երկու շաբաթով կգտնվեն առանձնացված տեղամասում՝ զորամասի բուժանձնակազմի խիստ հսկողության ներքո, անհրաժեշտության դեպքում նաև՝ կթեստավորվեն:
Կորոնավիրուսն ամառային զորակոչին չի խանգարի. կառավարությունը որոշել է ժամկետը
Նորակոչիկների հետ աշխատող անձնակազմը ծառայությունը կիրականացնի զորանոցային ռեժիմով։ Զորամասում նորակոչիկներին սնունդը կմատուցվի սանիտարահիգիենիկ պահանջների խիստ պահպանությամբ։
Հիշեցնենք, որ Հայաստանում զորակոչը կիրականացվի հուլիսի 1-ից օգոստոսի 30-ը։ Նախապատրաստական աշխատանքները կմեկնարկեն մայիսի 1-ից: Այդ մասին որոշումն ընդունվել է ապրիլի 23-ին կառավարության նիստում: