ԵՐԵՎԱՆ, 27 ապրիլի – Sputnik. Կորոնավիրուսով առաջին վարակակիրը, որի մասին ՀՀ առողջապահության նախարարությունը պաշտոնապես հայտարարեց մարտի 1-ին, Իրանից Հայաստան էր եկել փետրվարի 26-ին: Այս տեղեկությունն այսօր հայտնեց Իրանում ՀՀ արտակարգ և լիազոր դեսպան Արտաշես Թումանյանը ՀՀ ԱԺ արտաքին հարաբերությունների մշտական հանձնաժողովի նախաձեռնությամբ կազմակերպված «COVID 19. տարածաշրջանային իրավիճակ. դիմակայում և հնարավոր զարգացումներ» թեմայով առցանց քննարկման ժամանակ:
Դեսպանը հիշեցրեց, որ ԻԻՀ-ում կորոնավիրուսի վարակի առաջին դեպքերի մասին հայտարարվեց միայն փետրվարի 19-ին, ընդ որում` այդ երկրի իշխանությունը հայտարարեց միանգամից և՛ հիվանդության, և՛ մահվան դեպքերի մասին:
Իրանում ՀՀ դեսպանատունը փետրվարի 26-ին և 28-ին երկու հատուկ չվերթ կազմակերպեց, որոնցով, ինչպես հետագայում պարզվեց, Հայաստան էին ժամանել առաջին վարակակիրները:
«Փետրվարի 26-ի թռիչքով, այդ ինքնաթիռով մենք փաստորեն երկու վարակակիր ենք տեղափոխել, որոնք հետագայում մեկուսացվեցին։ Երկուսն էլ բուժվեցին, ու այդ երկու դեպքերն այլևս շարունակություն չեն ունեցել: Քննադատությունները շատ են եղել, թե ուշացած էր արձագանքը և այլն, բայց այս առումով ես կարծում եմ, որ մենք բացթողումներ չենք ունեցել»,- ասաց Թումանյանը:
Իրանագետ Վարդան Ոսկանյանն էլ համոզմունք հայտնեց, որ Իրանի առողջապահության համակարգը, չնայած վարակի մեծ տարածվածությանը, կարողացել է բավական արդյունավետ աշխատել կորոնավիրուսի դեմ, ինչի վկայությունն է բուժվածների մեծ թիվը:
Անդրադառնալով ՀՀ- Իրան սահմանին` Վարդան Ոսկանյանը շեշտեց, որ սահմանն այս ընթացքում երբևէ չի փակվել:
«Հայաստան-Իրան սահմանով տեղի է ունեցել բնակչության տեղաշարժերի սահմանափակում: Իսկ բեռնափոխադրումների ծավալը` որոշ սահմանափակումներով, ու տնտեսական հարաբերութունները երկու երկրների միջև այժմ էլ շարունակվում են: Բնականաբար, որոշակի խնդիրներ կան` կապված այն ապրանքների հետ, որոնք Իրանն արգելել է արտահանել»,- ասաց Ոսկանյանը։ Նա հորդորեց զերծ մնալ «Հայաստան-Իրան սահմանի փակում» արտահայտության կիրառումից` հատկապես հաշվի առնելով այն հանգամանքը, որ երկու երկրների հարաբերություններին ուշիուշով հետևում են նաև մեր հարևան ոչ բարեկամ երկրները, որոնք նաև փորձում են օգտվել այդ հանգամանքից:
Հիշեցնենք՝ նախապես հայտարարվել էր, որ Հայաստանում կորոնավիրուսով վարակվելու առաջին դեպքի մասին հայտնի էր դարձել մարտի 1-ի վաղ առավոտյան: Վարակվածը 29-ամյա մի տղամարդ էր, որը Իրանից Հայաստան է ժամանել փետրվարի 28-ին:
Մարտի 1-ի դրությամբ Հայաստանում արդեն 32 մարդու մեկուսացրել էին Ծաղկաձորի «Գոլդեն փելես» հյուրանոցում։ Բոլորը կորոնավիրուսով վարակված տղամարդու հետ ինքնաթիռում շփված քաղաքացիներն էին: Ինքնաթիռի մյուս ուղևորների նկատմամբ սահմանվել էր 14-օրյա տնային հսկողություն։
Հիշեցնենք, որ ապրիլի 27-ի դրությամբ Հայաստանում կորոնավիրուսով վարակվածների թիվը հասել է 1808–ի, 848 մարդ առողջացել է, 29-ը` մահացել: Այս պահին փաստացի բուժում է ստանում 931 պացիենտ: Ընդհանուր առմամբ կատարվել է 18547 թեստավորում: