ԵՐԵՎԱՆ, 25 ապրիլի — Sputnik. Շոտլանդիայի առողջապահության ազգային ծառայության ու երկրի խոշոր համալսարանների մասնագետները պարզել են, որ COVID-19-ը մոտ տասը տարով կրճատում է կյանքի միջին տևողությունը։ Այս տվյալները հրապարակել է Wellcome Open Research կայքը։
Հետազոտության արդյունքները հակասում են տարածված կարծիքին, թե կորոնավիրուսից մահանում են խրոնիկական հիվանդություններ ունեցողները. շոտլանդացի մասնագետները պնդում են, որ վարակը կարող է մահվան հասցնել նաև երիտասարդ և առողջ մարդկանց։
Նշվում է, որ կորոնավիրուսից մահացած տղամարդիկ կյանքից 13 տարի են կորցրել, իսկ կանանց դեպքում այդ վարակի պատճառով կյանքը կրճատվել է 11 տարով։
Ի՞նչ են ուտում մեկուսացված քաղաքացիները Հայաստանում. տեսանյութ
Նմուշի համար վերցրել են Առողջապահության համաշխարհային կազմակերպության տվյալները, որոնք օգտագործվում են տարբեր հիվանդությունների պատճառով կյանքի կորցրած տարիների հաշվարկի ժամանակ։ Օգտագործվել են Իտալիայում մահացության ու Մեծ Բրիտանիայում կյանքի ակնկալվող տևողության մասին տվյալները։
Բժիշկները նշում են, որ կորոնավիրուսը խոցում է ոչ միայն թոքերը, այլև այլ օրգաններն ու իմունային համակարգը։
Այս պահին աշխարհում COVID-19-ով վարակվածների թիվը գերազանցում է 2,8 միլիոնը։ Մահացել են ավելի քան 198 հազար մարդ, առողջացել՝ 815 հազարը։