ԵՐԵՎԱՆ, 23 ապրիլի – Sputnik. Պետությունը չի կարող բոլոր քաղաքացիների բոլոր ծախսերը վերցնել իր վրա: Այսօր կառավարության նիստում նման հիշեցում արեց ՀՀ ֆինանսների նախարար Ատոմ Ջանջուղազյանը՝ զինծառայողների ընտանիքների անդամներին պետպատվերի շրջանակներում մատուցվող բուժծառայությունների նոր ցանկը հաստատելու որոշման քննարկման ժամանակ:
«Նախատեսվում էր, որ այս ֆինանսավորումն իրականացվելու է առողջապահության ընդհանուր հատկացումներից, բայց վերջում հանգել է նրան, որ կա՛մ պահուստային ֆոնդից հատկացում կարվի, կա՛մ եթե այլ միջոցառումներին խնայողություններ կլինեն, կօգտագործվի այս նպատակով: Մինչդեռ ակնհայտ է, որ ստեղծված իրավիճակում բոլոր խնայողություններն ուղղվում են կորոնավիրուսի հետևանքով առաջացած խնդիրների լուծմանը»,- ասաց Ջանջուղազյանը:
Արդյունաբերության զարգացումն անհնար է. գումարները կծախսվեն կորոնավիրուսի վրա
Ինչ վերաբերում է բյուջեի պահուստային ֆոնդին, ֆինանսների նախարարը կառավարության իր գործընկերներին խորհուրդ տվեց դրա հետ ևս մեծ հույսեր չկապել:
«Պիտի խնդրեմ պահուստային ֆոնդի վրա մեծ հույս չդնել, որովհետև պահուստային ֆոնդի միջոցները հայտնի պատճառներով օգտագործվում են հիմա ծագած բազմաթիվ խնդիրների լուծման համար»,- ասաց ֆինանսների նախարարը:
Ատոմ Ջանջուղազյանը ներողություն խնդրեց ծրագրի պոտենցիալ շահառուներից՝ շեշտելով, որ իր դիրքորոշումը նրանց դեմ չէ:
Ֆինանսների նախարարը նաև հիշեցրեց, որ առողջապահության բնագավառի ծախսերը 2019թ-ին 2018-ի համեմատ արդեն աճել են 20 տոկոսով ու շարունակում են աճել:
ՀՀ վարչապետ Նիկոլ Փաշինյանը համաձայնեց Ջանջուղազյանի հետ՝ առաջարկելով ցանկացած ծախս ծրագրելուց առաջ «յոթ չափել, մեկ կտրել»:
Նշենք, որ Առողջապահության նախարարության առաջարկած նախագծով նախատեսվում է զինծառայողների ընտանիքների անդամներին նորագույն և թանկարժեք տեխնոլոգիաների կիրառմամբ մատուցվող ծառայությունները իրականացնել ամբողջությամբ պետության կողմից՝ անվճար:
Ծրագրի շահառուները զինծառայողների, փրկարար ծառայողների ընտանիքի անդամներն են: Ծրագրի ամբողջ արժեքը 300 մլն դրամ է: